گاؤں میں شراب کے ٹھیکے کے خلاف مظاہرہ

ریاست اترپردیش کے ضلع مظفر نگر کے تھانہ علاقے نئی منڈی کے گاؤں تیگری کے لوگوں نے آج کلکٹریٹ احاطے میں شراب کے ٹھیکے کو ہٹانے کے لیے زبردست مظاہرہ کیا۔

سیکڑوں گاؤں والوں نے گاؤں کے پردھان پردیپ کمار کی سربراہی میں گاؤں میں بنے ہوئے ٹھیکے کو ہٹانے کے لیے ایک میمورینڈم ضلع مجسٹریٹ کے نام اے ڈی ایم آلوک کمار کو سونپا اور اس ٹھیکے کو ہٹانے کو لیکر مطالبہ کیا۔

گاؤں کے موجودہ پردھان پردیپ کمار سینی نے بتایا کہ 'تیگری گاؤں کے خاص روڈ پر ایک شراب کا ٹھیکہ کھلا ہوا ہے، اس سے تھوڑا آگے چل کر جٹ مجھیڈا میں خواتین کے ایک ساتھ چار اسکول بھی ہیں۔ اس ٹھیکے کی وجہ سے اسکولی طالبہ سے آئے دن چھیڑ چھاڑ ہوتی رہتی ہے، جو جھگڑے کا سبب بنتی ہے۔ ہم نے انتظامیہ سے اس ٹھیکے کو ہٹوانے کو لیکر درخواست بھی دی ہے پر اب تک کوئی کارروائی نہیں ہوئی ہے۔ '

پردیپ کمار نے مزید کہا کہ 'اسی ٹھیکے کو ہٹوانے کو لیکر ہم آج بھی ضلع انتظامیہ کے پاس آئے ہیں اور ایک میمورینڈم ضلع مجسٹریٹ صاحبہ کو دیا ہے۔ اور ہم نے ان سے مطالبہ کیا ہے کہ اس ٹھیکے کو جلد از جلد ہٹوایا جائے تاکہ طالبات کو کسی بھی طرح کے دقتوں سے بچایا جا سکے۔