بجنور: معمولی جھگڑے میں چلی گولی، دو ہلاک

کتے کی خریداری کو لے کر دو گروپ کے درمیان ہوئی فائرنگ میں دو افراد ہلاک ہوگئے ہیں جبکہ ایک زخمی ہے۔ زخمی کو میرٹھ ریفر کر دیا گیا ہے۔

اترپردیش کے بجنور ضلع کے تھانہ دھام پور کے پاڈلی مانڈو میں گذشتہ رات دو گروپ میں کتے کی خریداری کو لے کر ہوئے جھگڑے میں دو افراد ہلاک ہو گئے جبکہ ایک شدید طور پر زخمی ہو گیا۔ معاملے کے مطابق دو گروپ میں کتے کی خریداری کو لیکر معاملہ اتنا بڑھا کہ ایک جانب سے فائرنگ شروع کر دی گئی۔

اچانک شروع ہوئی اس فائرنگ کی زد میں آنے سے ایک قہرسنگھ نامی راہگیر گولی لگنے سے موقع پر ہی ہلاک ہو گیا جبکہ دوسرے شخص پرشانت کی علاج کے دوران موت ہوگئی اور تیسرا شخص ستیندر زخمی ہوگیا ہے۔

ستیندر کی حالت بےحد نازک دیکھتے ہوئے اسے میرٹھ اسپتال ریفر کردیا گیا ہے۔ پولیس نے قتل کا معاملہ درج کر مجرم کی تلاش شروع کر دی ہے۔