ریاست مغربی بنگال کی حکمراں جماعت ترنمول کانگریس سے پہلے شھبندو ادھیکاری نے استعفیٰ دیا، اس کے بعد رکن اسمبلی جتیندر تیواری آسنسول میونسپل کارپوریشن کے ایڈمنسٹریٹو بورڈ کے چئیرمین کے عہدے سے استعفی دینے کے بعد آج ترنمول کانگریس چھوڑنے کا اعلان کیا۔
ترنمول کانگریس ابھی ان دونوں صدمے سے نکلنے کی کوشش کر رہی تھی کہ تبھی مالدہ کے باؤن گولہ کے پانچ بلاک صدور نے استعفی دینے کا اعلان کر دیا، مالدہ ضلع ترنمول کانگریس کی صدر بے نظیر موسم نور نے کہا کہ استعفی دینے کی خبر موصول ہونے کے بعد ان سے بات چیت کی جا رہی ہے۔
انہوں نے کہا کہ ضلع میں نئی کمیٹی تشکیل دی جائے گی، نئی کمیٹی میں ان لوگوں کو شامل نہیں کیا جائے گا، اسی بنیاد پر تمام لوگوں نے استعفی دینے کا فیصلہ کیا۔ ترنمول کانگریس ضلع کورڈینیٹر دلال سرکار نے کہا کہ ان لوگوں کے جانے سے پارٹی پر کوئی فرق نہیں پڑے گا۔
انھوں نے مزید کہا کہ ترنمول کانگریس میں ایسے لوگوں کی ضرورت نہیں ہے جو عین وقت پر دھوکہ دے دیں، ان لوگوں کو پارٹی میں رہنے کا کوئی حق نہیں ہے، استعفی دینے والے مستفیض الرحمان کا کہنا ہے کہ وہ ضلع رہنما کی کارکردگی سے مایوس ہو کر عہدے سے استعفی دیا ہے پارٹی سے نہیں۔ تعریف الدین اور سیف الدین نے ضلع ترنمول کانگریس کے رہنماوں کے خلاف ناراضگی کا اظہار کیا ہے۔
