رامپور: گرام پردھانوں کے لیے یک روزہ ورکشاپ کا انعقاد

ریاست اترپردیش کے رامپور میں نومنتخب گرام پردھانوں کے لیے ورکشاپ کا انعقاد کر کے عوامی بہبود کے لیے ترقیاتی کاموں سے متعلق جانکاری دی گئی۔ اس دوران ضلع انتظامیہ نے ضلع کے 684 مقامات سے آئے پردھانوں سے مسلسل 3 گھنٹے خطاب کرکے تعلیم، صحت اور روزگار کے موضوعات پر سیر حاصل گفتگو کی۔

رامپور ضلع کے گاؤں میں ترقیاتی کاموں کو بہتر طور پر شروع کرنے کے مقصد سے رامپور کے بھارت گارڈن میں ضلع انتظامیہ کے زیر اہتمام نومنتخب پردھانوں کے لئے تربیتی ورکشاپ کا اہتمام کیا گیا، جہاں ضلع انتظامیہ رویندر کمار ماندڑ نے اپنی طویل گفتگو میں گاؤں کی ترقی، بچوں کی تعلیم اور حفظان صحت و خواتین کے مسائل وغیرہ جیسے موضوعات پر گفتگو کی۔

ضلع انتظامیہ نے پردھانوں سے خطاب کرتے ہوئے بتایا کہ تقریباً 100 دن بعد اسمبلی انتخابات کے لئے ریاست میں ضابطہ اخلاق نافذ ہو جائے گا۔ اس دوران پردھان گاؤں کا کوئی ترقیاتی کام نہیں کر سکیں گے۔ اس لئے ضروری ہے کہ 100 دن کے اندر جتنا ہو سکے ترقیاتی کاموں کا منصوبہ بناکر اس کو مکمل کر لیں۔

ضلع کے نومنتخب 684 پردھانوں پر مشتمل یہ ورکشاپ صبح 11 بجے شروع ہوا جو دوپہر ساڑھے تین بجے تک جاری رہا۔ اس دوران جب ڈی ایم رویندر کمار ماندڑ پردھانوں سے خطاب کر رہے تھے تو کئی پردھان کی آنکھیں بند تھیں اور وہ نیند کا لطف لے رہے تھے۔ بہرحال پردھان انتظامیہ کے اس پروگرام سے مطمئین اور پرامید نظر آئے۔

اب دیکھنے والی بات یہ ہوگی کہ جس طرح سے یہاں ترقیاتی کاموں پر بحث کی گئی ہے، کیا زمینی سطح پر بھی اسی طرح عمل آوری ہوگی یا یہ ورکشاپ بھی محض ایک رسمی پروگرام بن کر رہ جائے گا۔