ایشیا کے سب سے بڑے تعلیمی بورڈ اترپردیش سیکنڈری ایجوکیشن کونسل (یوپی بورڈ) نے بدھ کو سال 2021 کے ہائی اسکول و انٹر میڈیٹ کے امتحان کی تاریخ کا اعلان کردیا ہے۔ 10ویں و 12ویں کے امتحانات 24 اپریل سے شروع ہوکر 12 مئی کو ختم ہوں گے۔
وزیر تعلیم و نائب وزیر اعلیٰ ڈاکٹر دنیش شرما نے بتایا کہ سال 2021 کے ہائی اسکول و انٹر میڈیٹ کے امتحانات ایک ساتھ 24 اپریل 2021 سے شروع ہوں گے۔ ہائی اسکول کے امتحانات 12 کام کے دنوں میں منعقد ہوکر 10مئی کو اختتام پذیر ہوں گے۔
انٹر میڈیٹ کے امتحانات کی مدت 15 دنوں پر محیط ہوگی اور 12 مئی 2021 کو مکمل ہوں گے۔ انہوں نے بتایا کہ گزشتہ سال 2020 میں بھی ہائی اسکول کے امتحانات 12 دنوں میں اور انٹر میڈیٹ کے امتحانات 15دنوں میں مکمل ہوئے تھے۔
نائب وزیر اعلی نے یہ بھی بتایا کہ سال 2021 ہائی اسکول امتحان میں 1674022 طلبا اور 1320290 طالبات کے ساتھ کل 2994312 امیدوار اور انٹر میڈیت کے امتحان میں 1473771 لڑکے اور 1135730 لڑکیوں سمیت کل 2609501 امیدوار مندرج ہیں۔
دونوں امتحانات میں مجموعی طور سے 3147793 لڑکے اور 2456020 لڑکیوں سمیت کل 5603813 امیدوار مندرج ہیں۔ سال 2020 کے ہائی اسکول میں 3024480 اور انٹر میڈیٹ کے امتحان میں 2586339 سمیت 5610819 امیدوار امتحان کے لئے اپنا اندراج کرایا تھا۔
نائب وزیر اعلی نے امتحان میں شرکت کرنے والے طلبا و طالبات کو پیغام دیا ہے کہ امتحان کی تاریخوں کا اعلان کردیا گیا ہے۔ طلبا و طالبات کو امتحان کی تیاری کا کافی وقت ملا ہے۔ امتحان کو ایک تہوار مانتے ہوئے خوشی کے ساتھ اس میں شریک ہوں۔
(یو این آئی)
