Supreme Court on Lakhimpur Kheri violence: سپریم کورٹ آشیش کی ضمانت کے خلاف عرضی پر 16 مارچ کو سماعت کرے گا

سپریم کورٹ نے منگل کو کہا کہ وہ مرکزی وزیر اجے مشرا کے بیٹے آشیش مشرا کو الہ آباد ہائی کورٹ کی طرف سے دی گئی ضمانت کو چیلنج کرنے والی عرضی پر بدھ کو سماعت کے لیے ایک بنچ تشکیل دے گی Lakhimpur Kheri violence۔

نئی دہلی: سپریم کورٹ لکھیم پور کھیری تشدد معاملے کے کلیدی ملزم آشیش مشرا کی ضمانت کے خلاف دائر عرضی پراب بدھ کے روزسماعت کرے گا۔

چیف جسٹس این وی رمن کی سربراہی والی بینچ نے منگل کے روز اس معاملے کو 16 مارچ کے لیے لسٹڈ کرنے کی ہدایت دیتے ہوئے کہا کہ اسپیشل لیو پٹیشن پر کل سماعت کی جائے گی۔

سپریم کورٹ نے 11 مارچ کو کہا تھا کہ عرضی کی سماعت 15 مارچ کو مناسب بینچ کے روبرو کی جائے گی، لیکن اس معاملے سے متعلق دیگر عرضیوں پر شنوائی کر چکی بینچ میں شامل جسٹس سوریہ کانت آج موجود نہیں تھے۔

عرضی گزار متوفی کسانوں کے اہل خانہ کے وکیل پرشانت بھوشن نے آج بھی عرضی کو انتہائی ضروری قرار دیتے ہوئے جلد شنوائی کی استدعا کی ۔ اس سے قبل انہوں نے 11 اور 4 مارچ کو بھی جلد شنوائی کی درخواست کی تھی۔

مسٹر بھوشن نے عدالت عظمیٰ کو بتایا کہ اتر پردیش میں لکھیم پور کھیری تشدد معاملے کے ایک گواہ پر گزشتہ جمعرات کی رات حملہ کیا گیا تھا۔ انہوں نے الزام عائد کیا کہ ملزمین کی طرف سے دھمکیاں دی جارہی ہیں کہ اب ان کی پارٹی ریاست میں دوبارہ اقتدار میں آگئی ہے۔

(یو این آئی)