کھیتوں میں پانی رکنے سے گنے کی فصل برباد

ریاست اترپردیش کے ضلع مئو میں گنے کے کاشتکار پیداوار میں خسارے کی وجہ سے کافی زیادہ پریشان ہیں اور انکی امداد کے لیے محکمہ گنا کی جانب سے کوئی خاص اقدام بھی نہیں کیا جارہا ہے۔

مشرقی اترپردیش میں کثیر پیمانے پر کی جانے والی گنے کی کاشت اس مرتبہ کافی خسارے میں ہے.

گنے کی اچھی کھیتی کے سبب مئو ضلع میں شوگر مل بھی قائم کی گئی ہے لیکن اس بار ہوئی بھاری بارش نے کاشتکاروں کے ارمانوں پر پانی پھیر دیا ہے. اچھی فصل کی امید لگائے کاشتکار کافی مایوس ہیں۔

بھاری بارش کے بعد تقریباً بیس روز سے کھیتوں میں جمع پانی اب گنے کی فصل برباد کر رہا ہے.

پانی کھیتوں میں سڑ جانے سے گنے کی جڑیں کمزور ہو گئی ہیں، گنے کے پودے گر رہے ہیں اور کاشتکار کسی طرح ان پودوں کو آپس میں باندھ کر کھڑا کرنے کی کوشش کر رہے ہیں۔

کاشتکاروں کو اس بات کی بھی سخت شکایت ہے کہ فصل برباد ہونے کے باوجود کوئی سرکاری عملہ مدد کو نہیں آیا۔

ایک برس میں تیار ہونے والی گنے کی فصل میں لاگت بھی کافی زیادہ آتی ہے ایسی صورت میں کاشتکاروں کو نقصان بھی زیادہ ہونے کا خدشہ ظاہر کیا جارہا ہے۔