ملک میں کورونا وائرس کی وجہ سے گذشتہ برس سے ہی تمام تعلیمی ادارے بند ہیں اور رواں برس کورونا وائرس کی دوسری لہر کافی زیادہ خطرناک ثابت ہوئی۔
جس کی وجہ سے کورونا کی چین کو توڑنے کے لیے ملک کے مختلف ریاستوں میں لاک ڈاؤن اور کورونا کرفیو نافذ کیا گیا۔ وہیں دوسری جانب کورونا کی تیسری لہر کی بھی پیش گوئی کی جارہی ہے جس سے زیادہ تر بچے متاثر ہوسکتے ہیں۔
کورونا کے انفیکشن کو بچوں میں پھیلنے سے روکنے کے لیے سب سے پہلے سی بی ایس ای بورڈ نے امتحانات منسوخ کرنے کا فیصلہ کیا اس کے بعد دیگر ریاستی حکومتوں نے بھی دسویں اور بارہویں جماعت کے بورڈ امتحانات کو بھی رد کرنے کا فیصلہ کیا ہے۔ ساتھ ہی یہ طے کیا گیا ہے کہ بغیر امتحانات کے تمام طلبا کو سابقہ کارکردگی کی بنیاد پر ترقی دی جائے گی۔
اس برس بورڈ کے امتحانات کی تیاری کرنے والے رامپور کے طلبہ و طالبات کا کہنا ہے انہوں نے بورڈ امتحان کے لیے کافی تیاریاں کی تھیں اور اچھے نمبرات حاصل کرنے کے لیے رات دن پڑھائی کی اور اب اچانک یہ اعلان کردیا گیا امتحانات نہیں کرائے جائیں گے۔
انہوں نے حکومت کے فیصلہ پر سوال کرتے ہوئے کہا کہ جب حکومت اقتدار حاصل کرنے کے لیے کورونا دور میں انتخابات کرا سکتی ہے اور بازاروں کو کھول سکتی ہے تو پھر امتحانات سماجی فاصلے کے ساتھ کیوں نہیں کرائے جا سکتے؟