'چند افراد ملک کے تعلیمی اداروں کا ماحول خراب کر رہے ہیں'

نوجوانوں کی فلاح و بہبود کے لئے کام کرنے والا حکومتی ادارہ 'نہرو یوا کیندر' کے نائب صدر دنیش پرتاپ سنگھ کا ماننا ہے کہ چند افراد ملک کے تعلیمی اداروں کا ماحول خراب کر رہے ہیں۔ اس ماحول کو بہتر بنانے میں 'نہرو یوا کیندر' اپنے کردار کو بہتر طریقے سے ادا کر رہا ہے۔

بارہ بنکی میں اپنے ادارے کی تقریب میں شرکت کرنے آئے دنیش پرتاپ سنگھ نے ای ٹی وی بھارت کے خصوصی سوال پر کہا کہ ملک کے نوجوانوں اور خاص کر کے جامعہ ملیہ، جے این یو اور دیگر یونیورسٹیز کے طلبہ کو گمراہ کیا جا رہا ہے۔ چند افراد ملک کے تعلیمی اداروں کا ماحول خراب کر رہے ہیں۔

انہوں نے کہا کہ سی اے اے قانون کے نافذ ہونے کے بعد 'نہرو یوا کیندر' نوجوانوں کو بیدار کرنے میں لگا ہے۔ جس کا نتیجہ یہ ہے کہ بارہ بنکی سمیت تمام ریاست میں امن و امان برقرار ہے۔ انہوں نے کہا کہ افواہوں پر لگام لگانے کے لئے 'نہرو یوا کیندر' کے رضاکار مسلسل کام کر رہے ہیں۔