'اسمارٹ کلاسز سے بچوں میں پڑھنے کا شوق اور جذبہ بڑھتا ہے'

بریلی میں گورنمنٹ اِنٹر کالج جی آئی سی سمیت ایک سو پرائمری اسکولوں اور چار انٹر کالجوں میں اسمارٹ کلاسز بنانے کی تیاریاں مکمل ہو چکی ہیں۔

گورنمنٹ انٹر کالج رامپور میں اسمارٹ کلاسز کا کام مکمل ہونے پر ٹیچرس کو تربیت دی جارہی ہے۔ یہاں ڈسٹرکٹ کلکٹر نتیش کمار نے جی آئی سی پہنچ کر پیش رفت کا معائنہ کیا۔

اس موقع پر اُنہوں نے کہا کہ' اسمارٹ کلاسز میں تعلیم حاصل کرنے کا مطلب بنیادی ڈھانچہ میں تبدیلی لانا ہے۔ طلباء کے لیے یہ ٹکنالوجی توجہ کا مرکز بھی ہے اور آسانی سے درس حاصل کرنے کا ذریعہ بھی ہے۔ معائنہ کے دوران، ڈی ایم نے اسمارٹ کلاس میں تربیت حاصل کرنے والے اساتذہ کو بتایا کہ 'انٹرایکٹو لرننگ' سے بچوں میں پڑھنے کا شوق اور جذبہ بڑھ سکتا ہے۔

ڈی ایم نے بتایا کہ' انہوں نے خود گورنمنٹ انٹر کالج سے ہائی اسکول اور انٹرمیڈیٹ تک تعلیم حاصل کی ہے۔ اسمارٹ کلاسز کے انعقاد میں گورنمنٹ انٹر کالج، گورنمنٹ گرلز انٹر کالج، مولانا آزاد انٹر کالج اور تِلک انٹر کالج کے ٹیچرس کو تربیت دی گئی ہے۔

اس دوران ڈسٹرکٹ انسپکٹر آف اسکول امرکانت نے بتایا کہ' انہوں نے ڈسٹرکٹ مجسٹریٹ سے سیکھا ہے کہ کس طرح کم وسائل سے بڑے کام انجام دیئے جا سکتے ہیں۔

اس کے بعد، ڈی ایم نے جسولی میں بنائے جانے والے اسمارٹ پرائمری اسکول کا معائنہ بھی کیا۔جی آئی سی میں اسمارٹ کلاسز کے آغاز کے موقع پر اساتذہ سے گفتگو کرتے ہوئے ڈی ایم نے ایک سرپرست کی طرز پر تمام ٹیچرس کو ہدایت دیتے ہوئے کہا کہ' سماج کو بہتر مستقبل دینے کا کام ایک ٹیچر کے سر ہوتا ہے'۔

ٹیچرز ایک پودے کو ابتدائی دور سے آبپاشی کرکے ایک سایہ دار درخت کی مانند تیار کرتا ہے۔ لہذا آپ کی ذمہ داری سماج کے دیگر ذمہ داران سے کہیں زیادہ اہم ہے۔