ریاست اترپردیش میں منعقد ہونے والے پنچائتی انتخابات کے لیے ضابطہ اخلاق نافذ ہوگیا ہے، رامپور میں ضلع مجسٹریٹ رویندر کمار منداڑ نے پریس کانفرنس کا اہتمام کرکے الیکشن کمیشن کی جانب سے ضابطہ اخلاق نافذ کیے جانے اور انتخابات سے متعلق انتظامیہ کی تیاریوں کے متعلق آگاہ کیا۔
رامپور کے صدر دفتر میں واقع کلکٹریٹ کے کانفرنس ہال میں ضلع مجسٹریٹ رویندر کمار منداڑ نے پریس کانفرنس کا اہتمام کرکے تین مراحل میں ہونے والے پنچایتی انتخابات 2021 کے لیے ضابطہ اخلاق کے تحت الیکشن کمیشن کے ذریعہ جاری احکامات سے متعلق جانکاری دی اور انہوں نے انتخاب کے دوران امن و امان کو بنائے رکھنے کے ساتھ ساتھ پرامن انتخابی عمل مکمل کرانے کے لیے انتظامی تیاریوں سے بھی روشناس کرایا۔
رویندر کمار منداڑ نے کہا کہ انتخاب کے دوران غیر قانونی سرگرمیوں پر سخت نگرانی رکھی جائے گی، شراب کے استعمال، جمع خوری اور خرید و فروخت پر روک تھام کے لیے مسلسل پولیس اور آبپاشی شعبہ کی ٹیمیں چھاپے ماری کی کاروائی کر رہی ہیں۔