پرینکا نے اس معاملے میں وزیراعلی یوگی آدتیہ ناتھ کو ایک خط بھی لکھا ہے اور ویڈیو پیغام بھی جاری کیا ہے۔ پرینکا گاندھی سوشل میڈیا پر بھی مزدوروں کو واپس لانے کا سوال اٹھاتی رہی ہیں۔
اس بارے میں حکومت کی جانب سے جمعہ کے روز میڈیا کو جانکاری فراہم کی گئی ہے۔ اس کے بعد پرینکا گاندھی نے سوشل میڈیا پر اپنے رد عمل کا اظہار کیا ہے۔ اس میں انہوں نے حکومت کو مبارکباد دینے کے ساتھ ہی یہ بھی کہا ہے کہ اگر تمام افراد مل کر کوشش کریں تو کورونا کو شکست دینا ناممکن نہیں ہے۔
کانگریس کے ریاستی صدر اجے کمار للو نے بھی پھنسے مزدوروں کو واپس لانے کی وکالت کی ہے اور انہوں نے اس سلسلے میں وزیر اعلی کو ایک خط بھی لکھا ہے۔
سوشل میڈیا پر پرینکا گاندھی نے لکھا ہے کہ دوسرے ریاستوں میں پھنسے اترپردیش کے کچھ مزدوروں کو واپس لانے کے لیے اترپردیش حکومت کا شکریہ۔ ہم اس مسئلے پر مستقل طور پر زور دے رہے ہیں اور یہ اس سمت میں ایک بامقصد قدم ہے۔ مکمل طور پر کامیاب ہونے کے لیے ، باقی مزدوروں کی واپسی کے لیے بھی منصوبہ بندی کرنا ضروری ہے۔ اگر ہم مثبت رویہ کے ساتھ ملک کے مفاد میں تعاون کرتے رہیں تو ہمیں کورونا سے لڑنے میں بہت طاقت ملے گی۔