اتر پردیش کی پولیس کے ذریعہ کانگریس کے اقلیتی سیل کے صدر کی گرفتاری کے بعد کانگریس رہنما پرینکا گاندھی نے یوپی حکومت پر سخت تنقید کرتے ہوئے ٹویٹ کیا ہے اور کہا کہ اس سے ہماری پارٹی عوامی موضوعات کو اٹھانے سے گریز نہیں کریگی۔
پرینکا گاندھی نے اس دوران متواتر دو ٹویٹ کیا۔ کانگریس رہنما نے اپنے پہلے ٹویٹ کے ساتھ ویڈیو ٹیگ کیا جس میں شاہنواز عالم کی گرفتاری کا ویڈیو ہے۔
کانگریس رہنما نے اپنے ٹویٹ میں لکھا کہ ''کانگریس رہنما اور کارکنان عوام کے موضوعات پر آواز اٹھانے کے لئے پرعزم ہیں۔ بی جے پی حکومت، یوپی پولیس کو جبر کا آلہ بناکر دوسری پارٹیوں کو آواز اٹھانے سے روک سکتی ہے، ہماری پارٹی کو نہیں۔
دیکھئے کس طرح یوپی پولیس نے ہمارے اقلیتی سیل کے صدر کو رات کے اندھیرے میں اٹھا لیا۔ پہلے جعلی الزامات کے متعلق ہمارے ریاستی صدر کو چار ہفتوں کے لئے جیل میں رکھا۔
یہ پولیسیا کاروائی جبر اور غیر جمہوری ہے۔
کانگریس کے سپاہی پولیس کی لاٹھیوں اور جعلی مقدموں سے نہیں ڈرنے والے۔ ''
واضح ہو کہ گزشتہ رات اتر پردیش کانگیرس اقلیتی سیل کے صدر شاہنواز عالم کو یوپی پولیس نے سی اے اے مخالف مظاہروں میں شامل ہونے کے معاملے میں لکھنؤ سے گرفتار کر لیا تھا۔ گرفتاری کے بعد اتر پردیش کانگریس صدر اجےکمار للو کی قیادت میں حضرت گنج تھانے پہنچے کانگریس کارکنان نے یوپی حکومت اور پولیس کے خلاف نعرے بازی کی تھی، جسکے بعد پولیس نے لاٹھی چارج کیا اور کانگریس کارکنان کی جم پٹائی کی۔
