ریاست اترپردیش کے شہر رامپور میں گذشتہ 24 گھنٹوں میں رامپور کی پولیس نے کووڈ پروٹوکول کی خلاف ورزی کرنے والوں کے پر سخت کاروائی کی ہے۔
ضلع میں بغیر ماسک کے گھوم رہے لوگوں سے تقریباً ایک لاکھ 60 ہزار 5 سو روپئے بطور جرمانہ وصول کیا گیا ہے جبکہ بلا ضرورت باہر نکلنے والی 19 گاڑیوں کو سیز بھی کیا گیا۔
اسی کے ساتھ ہی 395 گاڑیوں کا چالان بھی کاٹا گیا اور 87 ہزار 400 روپئے کی جرمانہ رقم وصول کی گئی۔ جبکہ 129 لوگوں کے خلاف دفعہ 151 سی آر پی سی کے تحت گرفتار بھی کیا گیا۔
کووڈ کرفیو میں ضروری سہولیات اور ناگزیر حالات کو چھوڑکر کسی کو بھی باہر نکلنے کی اجازت نہیں ہے۔ ساتھ ہی اگر کوئی شخص بغیر ماسک کے باہر نکلتا ہے تو اس سے ایک ہزار روپے بطور جرمانہ وصول کیا جا رہا ہے، وہیں دوسری مرتبہ بغیر ماسک کے نظر آنے پر اس سے 10 ہزار روپئے تک وصول کیے جا رہے ہیں۔ پولیس کا کہنا ہے کہ کورونا کرفیو کی خلاف ورزی کرنے والوں کے خلاف آئندہ بھی ایسی سخت کاروائی کی جاتی رہے گی۔