'مساجد سے تعدادِ مصلیان کا حکم ختم کیا جائے'

ضلع رامپور کے علماء کرام وملی قائدین نے مساجد میں پانچ مصلیان کی تعداد کے تعلق سے ریاستی حکومت سے مطالبہ کیا کہ' ان لاک ون میں جہاں دیگرشعبوں میں حکومت نے رعایت دی ہے. وہیں مساجد میں نمازیوں کی تعداد کے تعین کو بھی ختم کیا جائے۔

ریاست اترپردیش کے ضلع رامپور کی جامع مسجد میں آج علماء کرام اور ملی قائدین کی میٹنگ میں طے پایا کہ مساجد میں نمازیوں کی تعداد کے تعین سے متعلق ریاستی حکومت کی سخت ہدایات پر عمل کرنا بہت مشکل ہے، اس لئے میڈیا کے ذریعہ حکومت سے مطالبہ کیا گیا کہ ان لاک ون میں جہاں دیگر شعبوں میں حکومت نے رعایت دی ہے، وہیں مساجد میں نمازیوں کی تعداد کے تعین کو بھی ختم کیا جائے۔

رامپور میں کانگریس کے مقامی رہنماؤں نے بھی علماء کرام کے اس مطالبے کی حمایت کی۔

آپ کو بتادیں کہ ان لاک ون میں 8 جون سے مزید رعایت دیتے ہوئے مرکزی حکومت نے شاپنگ کامپلیکس، مالز اور عبادت گاہوں کو چند شرائط کے ساتھ کھولنے کی اجازت دی ہے۔

لاک ڈاؤن میں حکومت کی گائیڈ لائن کے مطابق بھارت کی سبھی مساجد میں صرف پانچ مصلیان کے نماز قائم کرنے کی اجازت کے سبب ریاستی حکومت کے قوائد و ضوابط پر ضلع کے علماء کو شدید اعتراض تھا۔

ان اعتراضات کے پیش نظر آج علماء و ملی قائدین نے جامع مسجد میں میٹنگ منقعد کی۔ جس میں طے پایا کہ جن مساجد میں نمازیوں کی تعداد کا تعین ممکن ہو سکے گا وہاں تو کیا جائے گا لیکن جہاں ممکن نہ ہو سکے وہاں حکومت سے مطالبہ کرکے ایسے قوائد و ضوابط کو ختم کرایا جائے گا۔

علماء کے اس فیصلے کی حمایت کرتے رامپور کے کانگریس رہنما بھی اترے۔ کانگریس کے سابق ریاستی صدر مطیع الرحمن ببلو نے ای ٹی وی بھارت سے بات کرتے ہوئے ریاست کی یوگی حکومت کو ہدف تنقید بنایا۔

انہوں نے کہا کہ حکومت نے جب دیگر شعبوں میں رعایت دی ہے اور تمام مذہبی عبادت گاہیں کھل چکی ہیں، تو پھر مساجد میں نمازیوں کی تعداد کے تعین پر اتنے قوائد و ضوابط کیوں'۔

انہوں نے کہا کہ' مساجد سے یہ پابندی ختم ہونی چاہئے'۔ انہوں نے مزید کہا کہ' وہ اس سلسلہ میں ضلع انتظامیہ سے بات کریں گے۔

وہیں کانگریس کے شہری صدر مامون شاہ خاں نے کہا کہ' کانگریس شروع سے ہی کورونا وائرس کے خلاف جنگ میں حکومت کا تعاون کر رہی ہے۔

انہوں نے کہا کہ 'یہ بات درست ہے کہ اس وبا کے پیش نظر کم گھروں سے نکلا جائے اور سماجی فاصلے کا خیال رکھا جائے، لیکن دیگر شعبوں کی طرح مساجد میں بھی پانچ سے زائد نمازیوں کے آنے کی رعایت دی جائے۔