یوپی پنچایت انتخابات: مسلمان بڑھ چڑھ کر اپنے حق رائے دہی کا استعمال کریں

رامپور میں مسلم رہنماؤں نے اپیل کی کہ یوپی پنچایت انتخابات چار مراحل میں ہوں گے اور یہ چاروں مراحل رمضان المبارک میں ہیں، اس لیے مسلمان نماز فجر کے بعد اپنے پولنگ بوتھوں پر پہنچ جائیں اور بڑھ چڑھ کر اپنے حق رائے دہی کا استعمال ضرور کریں۔

ریاست اترپردیش کے رامپور میں مسلم رہنماؤں نے اپیل کرتے ہوئے کہا کہ ریاست میں جاری پنچایت انتخابات میں مسلمان بڑھ چڑھ کر اپنے حق رائے دہی کا استعمال کریں اور کسی قسم کی بھی کوتاہی نہ برتیں۔

ریاست میں پنچایت انتخابات کے لیے پہلے مرحلے کی ووٹنگ 15 اپریل کو ہونی ہے، تمام امیدواروں نے اپنی کامیابی کے لیے پوری کوشش کررہے ہیں، ایک طرف جہاں حکمراں جماعت بی جے پی کے حامی امیدوار ووٹروں کو اپنی جانب راغب کرنے کے لیے حکومتی اسکیموں کو نافذ کرنے کی بات کر رہے ہیں تو وہیں کچھ امیدوار اور سیاسی پارٹیاں حکومت کی غلط پالیسیوں کو عوام کے سامنے رکھ کر عوام سے ووٹ کے ذریعہ حکومت کو آئینہ دکھانے کی بات کر رہے ہیں۔

اگر بات کی جائے رامپور کی تو یہاں مسلم آبادی زیادہ ہونے کی وجہ سے مسلمانوں کا ووٹ یہاں کافی فیصلہ کن ثابت ہو سکتا ہے، یہی وجہ ہے کہ مختلف تنظیموں کے مسلم رہنماؤں نے مشترکہ پریس کانفرنس کا اہتمام کر کے مسلمانوں سے زیادہ سے زیادہ اپنے حق رائے دہی کا استعمال کرنے کی اپیل کی۔

رکن پارلیمان اعظم خاں کی حامی جماعت اعظم وادی تنظیم کے صدر عظیم اقبال خاں ایڈووکیٹ نے کہا کہ ایسے امیدوار کا انتخاب کریں جو گاؤں دیہاتوں کے ترقیاتی کاموں کو اپنا مشن بنائیں۔

بار ایسو سی ایشن رامپور کے سینیئر رکن اور ترجمان ضمیر رضوی ایڈووکیٹ نے کہا کہ چار مراحل میں پنچایتی انتخابات ہونے ہیں اور چاروں مراحل رمضان المبارک میں ہیں، اس لیے مسلمان نماز فجر کے بعد اپنے پولنگ بوتھوں پر پہنچ جائیں اور اپنے حق رائے دہی کا استعمال ضرور کریں۔

واضح رہے کہ اترپردیش میں پنچایت انتخابات 15 اپریل سے 29 اپریل کے درمیان چار مراحل میں ہوں گے اور ووٹوں کی گنتی 2 مئی کو ہوگی۔

پہلے مرحلے یعنی 15 اپریل کو 19 اضلاع میں ووٹنگ ہوگی۔ بریلی ، ہاتھرس، آگرہ ، کانپور نگر ، جھانسی ، مہوبہ ، سہارن پور ، جون پور ، بھدوہی ، غازی آباد ، رام پور ، پریاگراج ، بریلی ، بستی ، سنتکبیر نگر ، گورکھپور ، رائے بریلی ، ہردوئی اور ایودھیا۔

19 اپریل کو دوسرے مرحلے میں 20 اضلاع میں ووٹنگ ہوگی۔ ان اضلاع میں بجنور ، امروہہ ، بدایوں ، اٹاہ ، مین پوری ، قنوج ، مظفر نگر ، باغپت ، وارانسی ، پرتاپ گڑھ ، گوتم بدھ نگر (نوئیڈا)، لکھنؤ ، سلطان پور ، لکھیم پور کھیری ، گونڈا ، اٹاواہ ، للت پور ، اعظم گڑھ ، چترکوٹ اور مہاراج گنج میں ووٹ ڈالیں جائینگے۔

تیسرے مرحلے کے تحت 20 اضلاع میں 26 اپریل کو ووٹنگ ہوگی۔ ان اضلاع میں سدھارتھ نگر ، دیوریا ، فیروز آباد ، اوریا ، فتح پور ، جالون ، حمیر پور ، بلیا ، اناؤ ، مرزا پور ، امیٹھی ، بارہ بنکی ، کانپور دیہات ، شاملی ، میرٹھ ، پیلی بھیت ، کاس گنج ، چندولی ، مرادآباد اور بلرام پور میں ووٹ ڈالے جائیں گے۔

چوتھے مرحلے کے تحت 19 اضلاع میں 29 اپریل کو ووٹنگ ہوگی۔ اس میں سنبھل ، ہاپوڑ ، علی گڑھ ، بلندشہر ، متھرا ، مئو ، فرخ آباد ، سیتا پور ، باندہ ، امبیڈکر نگر ، بہرائچ ، بستی ، کوشامبی ، سون بھدرہ ، غازی پور ، کشی نگر ، اور شاہجہان پور اضلاع میں ووٹ ڈالیں گے۔