الہ آباد ہائی کورٹ کی لکھنؤ بنچ نے عصمت دری کے معاملے میں جیل میں بند اترپردیش کے سابق وزیر گائتری پرساد پرجا پتی کو دو ماہ کی عبوری ضمانت دے دی ہے۔
لکھنؤ کے کنگ جارج میڈیکل کالج میں زیر علاج گائتری پرساد پرجا پتی نے کورونا وائرس انفیکشن کا حوالہ دے کر ضمانت کی عرضی داخل کی تھی۔ جسٹس وید پرکاش ویش نے سابق وزیر کو میڈیکل گراونڈ پر جمعہ سے دو ماہ کے لئے عبوری ضمانت دے دی ہے۔
عدالت نے ان کو دو۔ دو لاکھ روپئے کے دو ضمانتی اور پانچ لاکھ کے ذاتی مچلکے پر ضمانت دی ہے۔ الہ آباد ہائی کورٹ کی لکھنؤ ڈویژن نے انہیں متاثرہ یا اس کے کنبے کے اراکین پر دباؤ بنانے یا متاثر نہ کرنے کی ہدایت دی ہے۔
مزید پڑھیں:
عدالت نے حکم دیا ہے کہ وہ عبوری ضمانت کے دوران ملک چھوڑ کر باہر نہیں جائیں گے۔ قابل ذکر ہے کہ گائتری پرساد پرجا پتی کے خلاف لکھنؤ کے گوتم پلی پولیس اسٹیشن میں نابالغ کے ساتھ عصمت دری کا مقدمہ درج ہے۔