پنچایت انتخابات: کئی آزاد کامیاب امیدوار بی ایس پی سے وابستہ ہیں: مایاوتی

بہوجن سماج پارٹی (بی ایس پی) سپریمو مایاوتی نے پنچایت انتخابات کے نتائج کو پارٹی کے لئے حوصلہ افزا قرار دیتے ہوئے دعوی کیا ہے کہ انتخابات میں کامیابی حاصل کرنے والے بیشتر آزاد امیدوار بی ایس پی سے جڑے ہوئے لوگ ہیں۔

محترمہ مایاوتی نے جمعرات کو ایک بیان جاری کیا جس میں کہا گیا ہے کہ پنچایت انتخابات میں طاقت اور سرکاری مشینری کے غلط استعمال اور مخالف پارٹیوں کے ذریعہ بے پناہ رقم کے ناجائز استعمال کے باوجود بہوجن سماج پارٹی نے جو نتیجہ تقریبا پوری ریاست میں پیش کیا ہے وہ بہت حوصلہ افزا ہے۔ آئندہ اسمبلی کے عام انتخابات یہاں ہونے والے ہیں، یہ نتائج لوگوں کو نئی توانائی، جوش اور حوصلہ افزائی کرنے والا ہے۔

انہوں نے ریاست کے عوام کا تہہ دل سے شکریہ ادا کیا اور پارٹی کے ہر سطح کے تمام چھوٹے بڑے کارکنوں کو دلی مبارکباد پیش کی اور کہا کہ کامیاب ہونے والے تمام آزاد امیدواروں میں سے بیشتر دراصل بی ایس پی سے ہی جڑے ہوئے لوگ ہیں۔ جنہوں نے خاص طور سے ریزرو سیٹوں پر عام رضامندی نہیں بن پانے پر اپنی اپنی اہلیت سے ہی انتخابات لڑ کر کامیابی حاصل کی ہے۔

یو این آئی