'فیض کی نظم پر پروپیگنڈہ کیا جا رہا ہے'

فیض کی نظم 'ہم دیکھیں گے' پر اب بھی سیاسی و سماجی رہنماؤں کا رد عمل سامنے آرہا ہے۔ رامپور میں کانگریسی رہنما راشد علوی نے کہا کہ 'جو لوگ کم پڑھے لکھے ہیں، جن کی اردو سے واقفیت نہیں ہے، وہ فیض کی نظم پر پروپیگنڈہ پھیلا رہے ہیں۔'

کانگریسی رہنما راشد علوی ریاست اترپردیش کے رامپور پہنچے جہاں انہوں نے کہا کہ 'جو لوگ جاہل ہیں وہ فیض جیسے انتہائی سیکولر شاعر پر انگلی اٹھا رہے ہیں۔'

انہوں نے کہا کہ 'فیض کی جس نظم کا ذکر کیا جا رہا ہے وہ حکومت پاکستان کے خلاف انہوں نے لکھی تھی۔'

راشد علوی نے کہا کہ 'جو لوگ فیض کی نظم کی مخالفت کر رہے ہیں وہ دراصل پاکستان کی حمایت کر رہے ہیں۔'

ساتھ ہی انہوں نے کہا کہ 'جو لوگ پڑھے لکھے نہیں ہیں، جو اردو جانتے نہیں ہیں اور جو جاہل ہیں وہ اس طریقہ کا پروپیگنڈہ کر رہے ہیں۔'

فیض کے حوالے سے انہوں نے کہا کہ 'فیض احمد فیض انتہائی سیکولر آدمی تھے۔ دنیا بھر میں ان کی عزت ہے اور جو نظم انہوں نے لکھی تھی وہ اس وقت کی پاکستان میں ضیاء الحق حکومت کے خلاف تھی۔'