اترپردیش کے گوتم بودھ نگر کے دیہی علاقوں میں بدحال ہوئی صحت کی خدمات کو بہتر بنانے کی اب کوشش کی جارہی ہے۔ جیور سے تعلق رکھنے والے رکن اسمبلی ٹھاکر دھریندر سنگھ اپنے علاقے میں آنے والے صحت مراکز پر توجہ دے رہے ہیں۔ اس سلسلے میں بلاسپور قصبے کے پرائمری ہیلتھ سنٹر کو تیار کیا جائے گا۔
ایم ایل اے نے صحت مرکز کا دورہ کیا ہے۔ اس دوران میڈیکل اسٹاف اور بلاسپور نگر پنچایت کے چیئرمین ان کے ہمراہ تھے۔
اس سلسلے میں دھریندر سنگھ نے وزیراعلی یوگی آدتیہ ناتھ کو خط لکھا ہے جس میں بلاسپور قصبے میں صحت کے مرکز کو بحال کرنے کا مطالبہ کیا گیا ہے۔ بلاس پور میں واقع صحت مرکز ایک طویل عرصے سے بند پڑا ہے۔ دھریندر سنگھ کا کہنا ہے کہ اب وقت آگیا ہے کہ حکومت اور انتظامیہ لوگوں کی خدمت کے لئے بڑے اقدامات کرے۔
انہوں نے کہا ہے کہ اس وقت گاؤں کی طرف کووڈ 19 کا اثر بہت تیزی سے بڑھ رہا ہے۔ دیہی علاقوں میں بہت سے لوگ کورونا انفیکشن کا شکار ہیں۔ جس کی وجہ سے گریٹر نوئیڈا، جیور اور دنکور کے آس پاس کے دیہی علاقوں میں اب تک سیکڑوں افراد کورونا انفیکشن کی وجہ سے ہلاک ہوچکے ہیں۔ ایسی صورتحال میں لوگوں میں علاج معالجے کی کمی ہے۔
انہوں نے لکھا ہے کہ میں آپ کی توجہ گوتم بدھ نگر کے ایک بہت قدیم قصبہ بلاس پور کی طرف مبذول کرنا چاہتا ہوں۔ جہاں 2010 میں، صحت کی دیکھ بھال کرنے کے لئے ایک صحت مرکز قائم کیا گیا تھا۔ لیکن یہ پرائمری صحت مرکز بند ہے جس سے علاج معالجہ کا عمل متاثر ہے۔ گزارش ہے کہ اسے بحال کیا جائے۔