اسمبلی کے سامنے خودسوزی کرنے والی خاتون کی موت

اترپردیش کی راجدھانی لکھنؤ میں سکریٹریٹ کے سامنے خودسوزی کی کوشش کرنے والی خاتون نے بدھ کو دوران علاج دم توڑ دیا۔

سول ہسپتال کے چیف میڈیکل افسر ڈاکٹر آر کے پوروال نے یو این آئی کو بتایا کہ ہسپتال میں 'برن وارڈ' میں زیر علاج صوفیہ نامی خاتون کی آج صبح موت ہو گئی جبکہ اس کی بیٹی کی حالت مستحکم ہے۔

قابل ذکر ہے کہ امیٹھی کے جامو علاقہ سے تعلق رکھنے والی صوفیہ اور اس کی بیٹی گڑیا نے جمعہ کو لوک بھون کے گیٹ نمبر تین کے سامنے خود پر مٹی کا تیل ڈال کر خود کو آگ لگا لی تھی۔ پولیس نے دونوں کو سول ہسپتال میں داخل کرایا تھا۔

اس حادثے میں گڑیا معمولی طور سے جھلسی تھی جبکہ اس کی ماں صوفیہ 70فیصدی جھلسنے کی وجہ سے شدید طور پر زخمی ہوگئی تھی۔ متاثرہ ماں۔بیٹی نے میڈیا نمائندوں کو بتایا کہ گاؤں میں کچھ دبنگوں نے نالی کے تنازع میں ان سے مارپیٹ کی تھی اور لگاتار ان کو ہراساں کررہے تھے۔ ہر طرف سے مجبور ہوکر انہوں نے یہ انتہائی قدم اٹھایا تھا۔