نوئیڈا: زرعی بلز کے خلاف کانگریس کا احتجاج

ملک بھر میں متنازعہ زرعی بلز کے خلاف کسان سڑکوں پر احتجاج کر رہے ہیں۔ کسانوں کے احتجاج کو اپوزیشن کی جماعتوں کی تائید حاصل ہے۔

پارلیمنٹ میں اپوزیشن جماعتوں کی جانب سے بلز کی شدید مخالفت کے باوجود مودی حکومت نے بلز کو منظور کروالیا جس کے بعد ملک کے مختلف شہروں اور دیہاتوں میں کسان بلز کی مخالفت میں احتجاجی مظاہرہ کر رہے ہیں۔

نوئیڈا میں کانگریس پارٹی نے بل کی مخالفت میں احتجاجی مظاہرہ کیا اور کسانوں کی تائید میں مشعل جلاکر مارچ کا اہتمام کیا گیا۔ سیکٹر 15 نیا بانس کانگریس اقلیتی شعبہ کے ریاستی کوآرڈینیٹر کے دفتر پر کسان تحریک کی حمایت کرتے ہوئے حکومت کے خلاف نعرہ بازی کی گئی اور بل واپس لینے کا مطالبہ کیا۔

نوئیڈا: زرعی بلز کے خلاف کانگریس کا احتجاج

کانگریس کے مطابق راجیہ سبھا میں ووٹنگ کے بغیر بل کو پاس کرالیا گیا جو حکومت کی ناکامیوں اور آمریت کو اجاگر کرتا ہے۔ مرکزی حکومت کی جانب سے بل کو زبردستی کسانوں پر تھوپا جا رہا ہے جس سے کسان اپنے کھیتوں میں مزدور بن کر رہ جائیں گے۔

کانگریس کے سٹی صدر شہاب الدین نے متنازعہ بل کو جلدازجلد واپس لیتے ہوئے کسانوں کو راحت پہنچانے کا مطالبہ کیا۔ اس موقع پر پرشوتم ناگر،رضوان چودھری، لیاقت چودھری، للت اوانا، گوتم اوانا، دانش سیفی اور ڈاکٹر سیما و دیگر کارکنان موجود تھے۔