بدایوں: مُردوں کی ڈی ایم سے اپیل

اترپردیش کے ضلع بدایوں میں ایک سکریٹری کی بڑی لاپرواہی سامنے آئی ہے ، سکریٹری نے ضعیفی پنشن کی تصدیق کے دوران سات زندہ لوگوں کو مردہ قرار دے دیا ہے۔

اترپردیش کے ضلع بدایوں میں ایک عجیب وغریب معاملہ سامنے آیا ہے،گاؤں میں تعینات سکریٹری نے ایک ہی گاؤں کے سات زندہ افراد کو مردہ قراردےدیا ہے ۔

مردہ قرار دیئے گئے ساتوں افراد ضلع مجسٹریٹ دفتر پہنچے اور اپنے زندہ ہونے کی ثبوت فراہم کئے۔

اطلاع کے مطابق بدھ کو ڈی ایم دفتر میں بلاک سلارپور گرام پنچایت حسین پور کروتیا کے کچھ لوگ اپنی فریاد لے کر ڈی ایم سے ملنے پہنچے۔
ان کا کہنا تھا کہ ان کے گاؤں میں تعینات سکریٹری نوین کمار مہیشوری نے تصدتق کے دوران سرکاری ریکارڈ میں گاؤں کے 7 لوگوں کو مردہ دکھادیا ہے، جس سے ان کی ضعیفی پنشن آنی بند ہوگئی ہے۔
انہوں نے کہا کہ ان کو اس بات کا پتہ تب چلا جب انہوں نے پنشن نہ آنے پر اس کی جانکاری حاصل کی، انہیں پتہ چلا کہ انہیں ریکارڈ میں مردہ قرار دے دیاگیا ہے جبکہ وہ ساتوں ابھی زندہ ہیں۔

سابق گرام پردھان شہنشا نے کہا کہ جن لوگوں کو مردہ قرار دیا گیا ہے ان کے نام انصارحسین، افسر، علاؤالدین ، چمپا، معراجاً، عقیلہ اور افسرہیں جنہیں گاؤں میں تعینات سکریٹری نے سرکاری ریکارڈ میں مردہ قرار دے دیا ہے، جس سے ان لوگوں کی معمر پنشن رک دی گئی ہے۔

ڈی ایم دنیش کمار نے کہا کہ ہمارے پاس گاؤں حسین پور کروتیا کے کچھ لوگ آئے تھے جنہیں سکریٹری نے ریکارڈ میں مردہ قرار دے دیا ہے جس کی وجہ سے انہیں معمر پنشن نہیں مل پارہی ہے۔

سکریٹری کے خلاف معطل کرنے کی کارروائی کی جارہی ہے اور سبھی کو معمر پنشن دینے کے احکامات جاری کیے گئے ہیں۔