سپریم کورٹ نے بابری مسجد کی جگہ رام مندر تعمیر کرنے کی اجازت کے ساتھ ہی ایودھیا سے 20 کلومیٹر دور دھنی پور علاقے میں مسجد کی تعمیر کے لیے پانچ ایکڑ زمین فراہم کی تھی۔
رواں ماہ ایودھیا میں رام مسجد کی تعمیر کے سلسلے میں ’’بھومی پوجن‘‘ کے 20 روز بعد انڈو اسلامک کلچرل فاؤنڈیشن (آئی آئی سی ایف) نے دھنی پور میں مجوزہ مسجد کی تعمیر کے لیے لوگو ریلیز کیا ہے۔
اتر پردیش: ایودھیا مسجد کا لوگو ریلیز فاؤنڈیشن کے سربراہ و سنی وقف بورڈ کے چیئرمین زفر احمد فاروقی نے مسجد کی تعمیر کے سلسلے میں تیاری شروع کر دی ہے۔
ای ٹی وی بھارت کے ساتھ بات کرتے ہوئے انڈو اسلامک کلچرل فاؤنڈیشن کے ترجمان اطہر حسین نے کہا: ’’ایودھیا میں مسجد کی تعمیر کے سلسلے میں منصوبہ بندی کی جا رہی ہے اور پلان کے مطابق مسجد کے ساتھ ساتھ ایک کمیونٹی کِچن، ہسپتال اور ریسرچ سنٹر کے علاوہ عوام کو سہولیات پہنچانے والی دیگر سروسز کی بھی شروعات کی جائے گی۔‘‘
لوگو سے متعلق پوچھے گئے سوال کے جواب میں اطہر حسین کا کہنا تھا کہ ’’مسجد کا لوگو مغل شہنشاہ اکبر کے زمانے کی انڈو-اسلامک دور کی عکاسی کرتا ہے، جبکہ بادشاہ ہمایوں کے مقبرے پر اسی طرز کا ڈیزائن موجود ہے۔‘‘
لوگو میں استعمال کیے گئے آکٹاگرام (Octagram) سے متعلق انہوں نے کہا: ’’آکٹا گرام کا استعمال قرآن حکیم میں بھی ملتا ہے جہاں سے متاثر ہوکر اس لوگو کا ڈیزائن کیا گیا، وہیں آکٹاگرام کے نقوش یہودی مذہب اور عیسائیت جیسے دیگر ابراہمی مذاہب میں بھی ملتے ہیں۔‘‘
