مسجد کی انہدامی کارروائی پر سیاست

ریاست اتر پردیش کے بارہ بنکی ضلع کے رام سنیہی گھاٹ تحصیل کے احاطے میں واقع قدیمی خواجہ غریب نواز مسجد کی انہدامی کارروائی کا معاملہ اب طول پکڑتا جا رہا ہے۔ جبکہ اس معاملے پراب سیاست بھی تیز ہو گئی ہے۔

جمعرات کے روز سماجوادی پارٹی کے ایک وفد نے ضلع مجسٹریٹ کو میمورنڈم دیکر کر پورے معاملے کی جوڈیشل انکوائری کے ساتھ قصورواروں پر سخت کارروائی کا مطالبہ کیا۔ وہیں رام سنیہی گھاٹ جانچ کے لیے جا رہے کانگریس کے وفد کو پولیس اور انتظامیہ نے بارہ بنکی میں ہی روک لیا۔

اس معاملے کی تحقیقات کے لیے سماجوادی پارٹی کے قومی صدر اکھلیش یادو نے مقامی لیڈران کی ایک کمیٹی تشکیل کی تھی۔ کمیٹی جمعرات کو ضلع مجسٹریٹ سے ملاقات کی اور ریاستی گورنر کے نام میمورنڈم سونپا۔ میمورنڈم میں معاملے کی مکمل جوڈیشل تحقیقات اور قصورواروں پر کاروائی کا مطالبہ کیا گیا۔ اس دوران ایس پی کارکنان نے ریاستی حکومت پر شدید نکتہ چینی کی۔ ساتھ ہی انتباہ کیا کہ اگر انہیں انصاف نہیں ملا تو ایس پی اس معاملے کو اسمبلی میں اٹھائے گی۔

وہیں دوسری جانب ریاستی کانگریس صدر اجئے کمار للو کی قیادت میں ایک وفد رام سنیہی گھاٹ جاکر معاملے کی تحقیقات کرنا چاہتا تھا۔ لیکن پولیس اور انتظامیہ نے انہیں بارہ بنکی سے آگے جانے نہیں دیا۔ کانگریس کا الزام ہے کہ کووڈ-19 کی دوسری لہر میں ہوئی بدنظمی سے لوگوں کا ذہن ہٹانے کے لیے یہ کارروائی کی گئی ہے۔

وہیں بی جے پی نے اپوزیشن کے اس رویہ پر تنقید کی ہے۔ بی جے پی کا الزام ہے کہ اپوزیشن ایک طبقہ خاص کو خوش کرنے کے لیے یہ کر رہا ہے'۔