جموں کشمیر کے کپوارہ میں اسمگلنگ کی کوشش کو ناکام کردیا گیا اور 50 کروڑ روپیے مالیت کی ہیروئن ضبط کی گئی۔
فوج بی ایس ایف اورپولیس نے ایک مشترکہ کارروائی کے دوران ضلع کپوارہ کے ٹنگڈار سیکٹر میں دراندازی اورمنشیات اسمگلنگ کی ایک کوشش ناکام بنادی۔ فوج کی جانب سے جاری ایک بیان میں کہا گیاہے کہ فوج نے بی ایس ایف اورپولیس کےساتھ ملکر سرحدپار سے منشیات اسمگلنگ کی کوشش ناکام بنادی ہے۔
انہوں نے کہاکہ اسمگلروں کو جب حفاظتی اہلکاروں نے للکارا تووہ رات کی تاریکی میں واپس بھاگ جانے میں کامیاب ہوگئے تاہم وہ اپنے پیچھے منشیات کی ایک بھاری کھیپ چھوڑ گئے۔ لیفٹیننٹ کرنل نے بتایاکہ سیکورٹی اہلکاروں نے منشیات کی یہ کھیپ ضبط کرلی ،جس میں 10کلوگرام ہیروئن ہے۔
بیان کے مطابق بین الااقوامی مارکیٹ میں ضبط شدہ منشیات کی مالیت لگ بھگ پچاس کروڑ روپے بنتی ہے ۔انہوں نے کہاکہ منشیات اسمگلروں کیساتھ کچھ جنگجو بھی تھے، جو دراندازی کی کوشش کیلئے یہاں آئے تھے لیکن اُن کی کوشش بھی ناکام بنادی گئی۔ منشیات اسمگلروں کو پاکستانی فوج کی پشت پناہی اورحمایت حاصل ہے کیونکہ منشیات اسمگلنگ سے حاصل ہونے والی رقم کوکشمیرمیں ملی ٹنسی کوفروغ دینے کیلئے صرف کیاجاتاہے۔