واضح رہے کہ گزشتہ ماہ حکومت نے ہر اتوار اور بدھ کے روز ادھمپور سے بارہمولہ تک گاڑیوں کے چلنے پر پابندی عائد کر دی تھی ۔ بعد میں یہ پابندی سرینگر سے ادھمپور تک ہی رکھی گئی۔
ای ٹی وی بھارت کے نمائندے کے مطابق نئے سرکاری حکم نامے میں اب یہ پابندی ہر ہفتے میں صرف ایک روز اتوار کو رہے گی۔
سرکار کی جانب سے جاری اس حکم نامہ پر عوام سخت ناراضگی اور غصے کا اظہار کرتے ہوئے اسے یہاں کے عوام کے ساتھ ظلم سے تعبیر کر رہے ہیں۔
ای ٹی وی کے ساتھ بات کرتے ہوئے ٹرانسپورٹرز، تاجر پیشہ افراد اور اساتذہ نے سخت ردعمل کا اظہار کیا ہے۔
انہوں نے بتایا کہ شاہراہ پر پابندی سے انہیں قید کیا جا رہا ہے اور ان کا زبردست نقصان ہو رہا ہے۔
انہوں نے بتایا کہ یہ شاہراہ ان کے لیے لائف لائن کی مانند ہے اور اتوار کو یہاں کی بیشتر آبادی کا اس شاہراہ پر انحصار ہوتا ہے، ایسے میں اسے بند کرنا سراسر ظلم ہے۔
لوگوں نے گورنر انتظامیہ سے اپیل کی ہے کہ اس پابندی کو ہٹایا جائے یا کوئی دوسرا متبادل اختیار کیا جائے۔