زمین کھسکنے کا معاملہ: متاثرین محفوظ مقامات پر منتقل

جموں و کشمیر کے ضلع کولگام کے پہاڑی علاقے نورآباد کے گجر بستی رنگت دمحال ہانجی پورہ میں مسلسل برفباری اور بارشوں کی وجہ سے کئی مکانات میں شگاف پڑ گئے ہیں۔

کئی گھروں کی دیواروں میں شگاف پڑ گئے ہیں جس سے مقامی لوگوں کو شدید مشکلات کا سامنا کرنا پڑ رہا ہے۔

علاقے میں زمین کھسکنے اور دیواروں میں شگاف پڑ جانے کے سبب مقامی لوگ خوف زدہ ہیں اور وہاں سے متاثرین کو محفوظ مقام پر جانا پڑا ہے اور انتظامیہ سے مدد کی اپیل کی ہے۔

ادھر بارشوں کے نتیجے میں نورآباد کے کئی علاقوں میں زمین کھسک جانے کے بعد تحصیلدار دمحال ہانجی پورہ نیاز احمد نے بتایا کہ علاقے رینگت میں کئی مکانوں اور ایک باندھ کو نقصان پہنچا ہے اور علاقے کے کئی لوگوں کو محفوظ مقامات، پنچایت گھروں اور سرکاری اسکولوں میں منتقل کیا گیا ہے۔