مغربی بنگال میں ڈی جی پی کی تقرری پر گورنر نے رپورٹ طلب کی

ڈی جی پی کی تقرری پر مغربی بنگال کے گورنر جگدیپ دھنکر نے سوال اٹھایا ہے اور ریاستی حکومت سے اس سلسلے میں رپورٹ طلب کی ہے۔ گورنر نے ریاستی حکومت پر اصول و ضوابط کی خلاف ورزی کرنے کا الزام عائد کیا ہے۔ اس سلسلہ میں جگدیپ دھنکر نے ایک ٹویٹ کرکے وزیراعلی کو سپریم کورٹ کی ہدایت پر عمل کرنے کا مشورہ دیا ہے۔

ریاستی حکومت کی جانب سے ڈائرکٹر جنرل آف پولیس کی تقرری پر اعتراض کرتے ہوئے گورنر جگدیپ دھنکر نے حکومت کے فیصلے پر تنقید کی ہے۔ اس سلسلے میں جگدیپ دھنکر نے ایک ٹویٹ کیا ہے۔

انہوں نے سپریم کورٹ کے ایک فیصلے کا حوالہ دیتے ہوئے اپنا ٹویٹ وزیراعلی ممتا بنرجی کو ٹیگ کیا اور کہا کہ کہ یو پی ایس سی کے پینل سے ہی کسی کو ڈی جی پی کے عہدے پر فائز کرنا درست ہے۔ انہوں نے کہا کہ ڈی جی پی کی تقرری کے موقع پر ریاستی حکومت کو سپریم کورٹ کی ہدایات پر عمل کرنا چاہئے تھا۔

مغربی بنگال اسمبلی انتخابات کے دوران الیکشن کمیشن نے ڈی جی پی ویریندر کا تبادلہ کر دیا تھا، الیکشن بعد ریاستی حکومت نے پھر سے ویریندر کو ریاستی پولس کے ڈی جی پی کے عہدے پر وزیراعلی ممتا بنرجی نے بحال کر دیا ہے، جس کے بعد ڈی جی پی کی تقرری پر گورنر جگدیپ دھنکر نے سوال اٹھایا اور ریاستی حکومت سے اس سلسلے میں رپورٹ طلب کی ہے۔