سی پی ایم کا بی جے پی کے ریاستی صدر پر طنز

سی پی ایم رہنما سوجن چکرورتی نے بی جے پی کے ریاستی صدر دلیپ گھوش پر تنقید کرتے ہوئے کہا کہ ’’گؤ موتر کی بات کرنے والے کو خود ہسپتال جانا پڑا۔‘‘

مغربی بنگال بھارتیہ جنتا پارٹی (بی جے پی) کے صدر دلیپ گھوش کورونا وائرس کو ختم کرنے کے لئے گؤ موتر استعمال کرنے کی باتیں کرتے رہے ہیں۔ تاہم گزشتہ روز کورونا وائرس مثبت پائے جانے کے بعد بی جے پی کے ریاستی صدر کو ہسپتال میں داخل کرایا گیا۔

سی پی ایم کے سنئیر رہنما سوجن چکرورتی نے کہا ’’میں امید کرتا ہوں کہ دلیپ گھوش جلد سے جلد صحتیاب ہو جائیں۔‘‘ تاہم انہوں نے طنز کرتے ہوئے کہا: ’’لیکن سمجھ میں نہیں آ رہا ہے کہ دلیپ گھوش کو ہسپتال جانے کی ضرورت کیا پڑی، وہ تو اکثر وبیشتر گؤ موتر کی بدولت کورونا وائرس کو ختم کرنے کی بات کرتے تھے لیکن جب وہ بیمار پڑے تو خود ہسپتال کا رخ کیا۔‘‘

انہوں نے کہا کہ بی جے پی کے رکن پارلیمان کو اپنی ہی باتوں پر یقین نہیں ہے لیکن دوسروں کو گؤ موتر استعمال کرنے کا مشورہ دیتے ہیں۔

سی پی ایم کے رہنما نے کہا کہ ہر چیز میں سیاست کرنے کی ضرورت نہیں ہے، اس سے کسی کو کچھ بھی حاصل ہونے والا نہیں ہے۔

واضح رہے کہ بی جے پی کے ریاستی صدر دلیپ گھوش ان دنوں ہسپتال میں زیر علاج ہیں، حال ہی میں انکی کورونا رپورٹ مثبت پائی گئی تھی۔