ٹی ایم سی رہنما کا بی جے پی میں شامل ہونے کا امکان

بی جے پی کے ریاستی صدر دلیپ گھوش نے کہا کہ ترنمول کانگریس کے باغی رہنماؤں کا پارٹی میں خیرمقدم کرنے کے لئے تیار ہیں۔

مغربی بنگال میں اسمبلی انتخابات سے قبل بڑے پیمانے پر دل بدل کا اندیشہ پیدا ہو گیا ہے۔ بی جے پی کے ریاستی صدر دلیپ گھوش کا کہنا ہے کہ میں آکسیجن سلینڈر لے کر گھوم رہا ہوں، دوسری پارٹیوں کے رہنماؤں کو سانس لینے میں تکلیف ہوتی ہے تو ان کا بی جے پی خیرمقدم ہے۔
انہوں نے کہا کہ ہم دل بدل یا توڑ جوڑ کی سیاست نہیں کرتے ہیں، بی جے پی میں اس کے لئے کوئی جگہ نہیں ہے۔ انہوں نے کہا کہ کسی بھی بھی پارٹی کے ناراض رہنماؤں سے پارٹی میں شامل کرنے کو لے کر کوئی بات چیت نہیں ہوئی ہے۔
دلیپ گھوش کا کہنا ہے کہ ترنمول کانگریس کے دس ارکان اسمبلی بی جے پی سے مسلسل رابطہ کرنے کی کوشش کر رہے ہیں۔ وہ بی جے پی میں شامل ہونے والے ہیں لیکن ہم نے اس سلسلے میں ابھی تک کوئی جواب نہیں دیا۔
بی جے پی کے رہنما نے کہا کہ ترنمول کانگریس کے ارکان اسمبلی خود پارٹی میں رہنا نہیں چاہتے ہیں، اس لئے وہ روزانہ پارٹی مخالف بیان بازی کرتے ہیں۔

بیرون ریاستوں کے رہنماؤں کو انتخابی تشہیر کی ذمہ داری سونپنے کے سوال پر دلیپ گھوش نے کہا کہ جن لوگوں کو ذمہ داری سونپی گئی ہے وہ سب بی جے پی مرکزی کمیٹی کے رکن ہیں۔ انہوں نے کہا کہ ہم ترنمول کانگریس کی طرح پرشانت کیشور کو پارٹی ڈور نہیں تھماتے ہیں۔