مغربی بنگال: رکن اسمبلی نوشاد صدیقی کے قافلے پر حملہ

مغربی بنگال میں جنوبی 24 پرگنہ کے بھانگوڑ تھانہ علاقے میں نامعلوم شرپسندوں نے انڈین سیکولر فرنٹ کے رہنما اور رکن اسمبلی نوشاد صدیقی کے قافلے پر حملہ کردیا۔ اس سے علاقے میں کشیدگی پھیل گئی۔

وزیراعلیٰ ممتا بنرجی کی سخت ہدایت کے باوجود مغربی بنگال کے مختلف اضلاع میں سیاسی جماعتوں کے حامیوں کے درمیان خونی جھڑپوں کا سلسلہ جاری ہے۔ ریاست کے تمام اضلاع میں جاری سیاسی جھڑپوں میں اب تک 25 لوگوں کی موت ہوچکی ہے جبکہ سینکڑوں افراد زخمی ہوئے ہیں۔

اطلاعات کے مطابق جنوبی 24 پرگنہ کے بھانگوڑ تھانہ علاقے میں نامعلوم شرپسندوں نے انڈین سیکولر فرنٹ کے رہنما نوشاد صدیقی کے قافلے پر حملہ کردیا۔بھانگوڑ سے رکن اسمبلی نوشاد صدیقی اپنے حلقے کے دورے پر نکلے تھے تبھی نامعلوم شرپسندوں نے ان کے قافلے پر حملہ کردیا۔ حملہ میں نوشاد صدیقی کی گاڑی کو نقصان پہنچا۔

حملے میں کسی کے زخمی ہونے کی کوئی اطلاع نہیں ہے۔ پولیس نے جائے وقوع پر پہنچ کر حالات کو قابو میں کیا۔ پولیس نے نامعلوم افراد کے خلاف مقدمہ درج کرکے تحقیقات کا آغاز کیا ہے اور مجرمین کی تلاش کی جارہی ہے۔

واضح رہے کہ جنوبی 24 پرگنہ کے بھانگوڑ اسمبلی حلقے سے انڈین سیکولر فرنٹ کے اہم ترین رہنما نوشاد صدیقی نے ترنمول کانگریس کے امیدوار کو شکست دی تھی۔ نوشاد صدیقی انڈین سیکولر فرنٹ کے واحد نومنتخب رکن اسمبلی ہیں۔