'ملک میں رہنے والا ہر شخص بھارتی ہے، اسے بیرونی نہ کہا جائے'

پریس کانفرنس کے دوران وزیر داخلہ امت شاہ نے کہا کہ ممتابنرجی کی سیاست سے ملک میں افراتفری کا ماحول پیدا ہو سکتا ہے۔

ریاست مغربی بنگال کے دوروزہ دورے پر روڈ شو کے بعد ایک پریس کانفرنس سے خطاب کرتے ہوئے وزیر داخلہ امت شاہ نے کہا کہ ملک میں رہنے والا ہر شخص بھارتی ہے۔ اسے بیرونی کہہ کر بے عزت نہ کیا جائے۔

انہوں نے کہاکہ ممتا بنرجی اس طرح کی بات کہ کر کیا بتانا چاہتی ہیں کہ عام لوگوں کو ایک ریاست سے دوسری ریاست جانے کے لئے اجازت لینی پڑے گی، یہ بنگال کیا، کہیں بھی چلنے والا نہیں ہے۔

انہوں نے کہاکہ ممتا دیدی اس سے پہلے کانگریس میں تھی۔ تب کیا وہ وزیر اعظم اندرا گاندھی، پی وی نرسمہا راؤ، سمیت دیگر کانگریسی رہنماوں کو بیرونی کہا کرتی تھیں، جو آج دیگر ریاست کے سیاسی رہنماؤں کو وہ بیرونی کہ رہی ہیں۔

انہوں نے مزید کہاکہ' ملک کی دوسری ریاستوں سے تعلق رکھنے والے بی جے پی رہنما بنگال آئیں گے اور بی جے پی کی حکومت بنانے میں مدد بھی کریں گے۔ بنگال میں رہنے والا ہر شخص بھارتی اور بیرون ریاست سے بنگال آنے والے سبھی لوگ بھارتی ہیں۔اس پر بحث نہیں ہونی چاہئے۔

بنگال میں صدر راج نافذ کرنے کے سوال پر امت شاہ نے کہا کہ یہ اہک سنجیدہ معاملہ ہے۔