باہری لوگوں میں ممتابنرجی کو روکنے کی طاقت نہیں: نصرت جہاں روحی

ترنمول کانگریس سے رکن پارلیمان واداکارہ نصرت جہاں روحی نے کہا کہ باہری لوگوں میں ممتابنرجی کو روکنے کی طاقت نہیں ہے۔

مغربی بنگال اسمبلی انتخابات 2021 کے پانچوں مرحلے کے لیے آئندہ 17 اپریل کو ووٹ ڈالے جائیں گے۔

الیکشن کمیشن کی جانب سے پانچویں مرحلے کے لیے پہلے سے زیادہ سخت سکیورٹی انتظامات کرنے کا فیصلہ کیا گیا ہے تاکہ کوچ بہار جیسا واقعہ دوبارہ رونما ہونے سے روکا جا سکے۔

اسی درمیان شمالی 24 پرگنہ کے بشیر ہاٹ سے ترنمول کانگریس کی رکن پارلیمان نصرت جہاں روحی نے انتخابی کمیشن اور بی جے پی پر زبردست تنقید کی۔ رکن پارلیمان اور اداکارہ نصرت جہاں روحی نے کہا کہ' باہری لوگوں میں ممتابنرجی کو روکنے کی طاقت نہیں ہے'۔

بے باک بیان بازی کے لیے مشہور نصرت جہاں روحی کا کہنا ہے کہ چند لوگ باہر سے آکر ریاست مغربی بنگال کی فضا بگاڑنے کی سازش میں مصروف ہیں۔ ان کی سازش کبھی کامیاب نہیں ہوگی'۔

ٹی ایم سی رکن پارلیمان نصرت جہاں

انہوں نے کہا کہ' مغربی بنگال میں حالات تیزی سے بدل رہے ہیں۔ ترنمول کانگریس کی سربراہ ممتا بنرجی نے جس طرح سے تنہا بی جے پی، الیکشن کمیشن اور مرکزی فورسز کے خلاف محاذ کھول رکھا ہے وہ قابل تعریف ہے'۔نصرت جہاں روحی نے کہا کہ' تین چار لوگوں کو کیا محسوس ہو رہا ہے کہ وہ ممتا بنرجی کو روکنے میں کامیاب ہو جائیں گے، ہرگز نہیں'۔انہوں نے کہا کہ ممتا بنرجی کو بنگال کی حمایت حاصل ہے اور اسی بنیاد پر ہم بی جے پی کو شکست دیں گے اور بنگال میں نفرت اور مذہب کے نام پر سیاست کرنے والوں سے نجات دلائیں گے'۔بشیر ہاٹ سے ترنمول کانگریس کی رکن پارلیمان نصرت جہاں روحی کا کہنا ہے کہ کسی کے کچھ کہنے سے کچھ ہوتا نہیں ہے۔ ممتابنرجی مسلسل تیسری مرتبہ وزیراعلیٰ بنیں گی'۔