غنڈہ گردی کا معقول جواب دیا جائے گا: ٹی ایم سی

رکن پارلیمان کلیان بنرجی نے ایک بار پھر بی جے پی کو ہدف تنقید بناتے ہوئے کہا کہ کسی کی بھی غنڈہ گردی کا معقول جواب دینے کے لئے ہم تیار ہیں۔

مغربی بنگال میں آئندہ سال منعقد ہونے والے اسمبلی انتخابات کے مدنظر حکمراں جماعت ترنمول کانگریس اور بی جے پی کے رہنماؤں کے درمیان لفظی جنگ عروج پر پہنچ گئی ہے۔

روزانہ حکمراں جماعت ترنمول کانگریس اور بی جے پی کے رہنماؤں کے درمیان بیان بازی کا سلسلہ جاری ہے۔ اس سے عوام کو دلچسپ اور سنسنی خیز تبصرے سننے کو مل رہے ہیں۔

کلیانی بنرجی

ہگلی ضلع کے شری رام پور سے ترنمول کانگریس کے رکن پارلیمان کلیان بنرجی نے کہا کہ بی جے پی کے ریاستی صدر دلیپ گھوش ایک سانپ کے مانند ہیں، جو روزانہ صبح سے لے کر شام تک ڈسنے کے لئے اِدھر اُدھر بھٹکتے رہتے ہیں۔

انہوں نے کہا کہ بیرونی ریاستوں سے تعلق رکھنے والے بی جے پی کے رہنماؤں کے جب سے مغربی بنگال آنے کا سلسلہ شروع ہوا ہے اس وقت سے ریاست کے حالات میں تیزی سے بدلاؤ آئے ہیں۔ بیرونی ریاستوں کے رہنماؤں کے آنے سے چند لوگوں کو فائدہ ہو سکتا ہے لیکن مجموعی طور پر عوام کو نقصان کا سامنا کرنا پڑ سکتا ہے۔ کیونکہ بیرونی ریاستوں کے رہنماؤں کو بنگال کے لوگوں سے ہمدردی کم اور اقتدار کی چاہت زیادہ ہے۔

ترنمول کانگریس کے رکن پارلیمان کا کہنا ہے کہ ترنمول کانگریس کا معنی انقلاب ہوتا ہے۔ ترنمول کانگریس جب تک اقتدار میں رہے گی اس وقت تک بی جے پی جیسی پارٹی کے حکومت بنانا خواب خواب ہی رہ جائے گا۔

انہوں نے کہا کہ سیاست کی جائے تو اس میں ہم سب کی بھلائی ہے۔ اگر کوئی غنڈہ گردی کرنے کی کوشش کرے گا تو معقول جواب دیا جائے گا۔

ترنمول کا نگریس کے رکن پارلیمان کے مطابق اسمبلی انتخابات کے بعد نریندر مودی بھی سوچیں گے کہ وہ انتخابی تشہیر کے لئے آخر کیوں بنگال گئے۔