شوبھندو ادھیکاری کے والد سیشیر ادھیکاری کا کہنا ہے کہ ممتا بنرجی نے نندی گرام سے اسمبلی انتخابات لڑنے کا فیصلہ اسی لیے کیا ہے کہ وہ میرے بیٹے کے سیاسی سفر کا خاتمہ چاہتی ہیں۔ ان کے مطابق شوبھندو ادھیکاری، ٹی ایم سی رہنما ابھیشیک بنرجی کے سیاسی کریئر کو ختم کرنا چاہتے تھے اسی لیے ممتا بنرجی نے میرے بیٹے کے سیاسی کریئر کو ختم کرنے کا فیصلہ کیا ہے'۔
دراصل سوشل میڈیا پر ایک ویڈیو وائرل ہو رہا ہے جس میں یہ باتیں سامنے آئی ہیں۔ ویڈیو میں بی جے پی کی رکن پارلیمان لاکٹ چٹرجی کھانا کھا رہی ہیں جبکہ سیشیر ادھیکاری ان کی خاطر تواضع کر رہے ہیں۔ اسی دوران لاکٹ چٹرجی سیشیر ادھیکاری سے سوال کرتی ہیں کہ آخر ممتا بنرجی نے نندی گرام سے الیکشن لڑنے کا فیصلہ کیوں کیا؟ اس کے جواب میں ترنمول کانگریس کے سینئیر رہنما سیشیر ادھیکاری کہتے ہیں کہ 'میرے بیٹے کے سیاسی کریئر کا خاتمہ کرنے کے لیے انہوں نے وہاں سے پرچہ نامزدگی داخل کی ہے۔ سیشیر ادھیکاری یہ بھی کہتے ہیں کہ ان کے رہتے ہوئے ممتا ایسا کبھی نہیں کر پائیں گی'۔
وزیر اعظم نریندر مودی کے کانتھی میں آئندہ 24 مارچ کو ہونے والے انتخابی جلسے کی تیاریوں کا جائزہ لینے کے لیے لاکٹ چٹرجی کانتھی پہنچی تھیں، جہاں سے انہوں نے شوبھیندو ادھیکاری کے گھر جاکر سیشیر ادھیکاری سے ملاقات کی اور ان کے گھر کھانا کھایا۔ اس درمیان ان کے درمیان یہ ساری بات چیت ہوئی۔ سیشیر ادھیکاری کی بھی بی جے پی میں شامل ہونے کی قیاس آرائیاں کی جا رہی ہیں۔'