ریاست مغربی بنگال میں تیزی سے کورونا وائرس کے بڑھتے ہوئے کیسز کے پیش نظر کسی بھی ہاٹ اسپاٹ زون سے مسافر بردار طیاروں کو کولکاتا ایئر پورٹ پر نہیں اتارنے کا فیصلہ کیا گیا ہے۔
کولکاتا ایئرپورٹ انتظامیہ کے مطابق کولکاتا ایئرپورٹ پر آئندہ 6 جولائی سے 19 جولائی تک ملک کے چھ شہروں کے مسافر بردار طیاروں کو اترنے کی اجازت نہیں ہوگی۔
انتظامیہ نے ممبئی، دہلی، چنئی، ناگپور، پونے اور احمد آباد شہروں کے مسافر بردار طیاروں کو کولکاتا ہوئی اڈے پر اترنے پر پابندی لگا دی ہے۔
واضح رہے کہ ریاست میں کورونا وائرس کے معاملات میں روز بروز اضافہ ہونے سے پریشان ریاستی حکومت کی طرف سے تحفظاتی اقدامات کے پیش نظر مرکزی حکومت سے ملک کے آٹھ ریاستوں سے کولکاتا ہوائی اڈے پر پروازوں کو منسوخ کرنے کی اپیل کی گئی تھی۔
ریاستی حکومت کی طرف سے جن آٹھ شہروں سے پروازوں کو کولکاتا ایئرپورٹ پر نہ آنے کی اپیل کی گئی تھی ان میں ممبئی، دہلی، چینئی پونے، ناگپور، احمدآباد کے علاوہ اندور اور سورت بھی شامل تھے۔
اس کے جواب میں آج کولکاتا ہوائی اڈہ انتظامیہ کی طرف سے ٹویٹ کے ذریعے اطلاع دی گئی کہ آئندہ 6 جولائی سے 19 جولائی تک ممبئی، دہلی،چنئی، ناگپور، پونے اور احمد آباد سے پروازیں کولکاتا کے لیے روانہ نہیں ہوں گی۔