مغربی بنگال کی حکمراں جماعت ترنمول کانگریس کے قومی جنرل سکریٹری ابھیشک بنرجی پر ترپورہ میں ہوئے حملے کی مذمت کا سلسلہ جاری ہے۔
ترنمول کانگریس کی رکن پارلیمان موسم بےنظیر نور نے تری پورہ میں ابھیشک بنرجی پر ہوے حملہ کی سخت مذمت کی ہے۔
انہوں نے کہا کہ ترنمول کانگریس کے قومی جنرل سکریٹری اور ڈائمنڈ ہاربر سے رکن پارلیمان ابھیشک بنرجی پر حملہ ایک سوچی سمجھی سازش ہے۔
انہوں نے کہا کہ 'تریپورہ میں بی جے پی کی حکومت ہے۔ ابھیشک بنرجی مغربی بنگال کی حکمراں جماعت ترنمول کانگریس کے قومی جنرل سکریٹری ہیں۔ تریپورہ کی حکومت کو سب کچھ معلوم ہونے کے باوجود ان کے لئے مناسب سکیورٹی انتظامات فراہم کرنے میں ناکام رہی ہے۔'
انہوں نے مزید کہا کہ ابھیشک بنرجی پر حملے سے یہ ثابت ہوتا ہے کہ بی جے پی ترنمول کانگریس کی پیش قدمی سے خوفزدہ ہے۔
انہوں نے کہا کہ ایسے حملوں سے ترنمول کانگریس کی پیش قدمی پر کوئی اثر پڑنے والا نہیں ہے۔ بلکہ اس کی مقبولیت میں مزید اضافہ ہوگا۔