کولکاتا: عید میلادالنبیﷺ کی تیاریاں زوروں پر

کولکاتا و اطراف میں جشن عید میلادالنبیﷺ کے مد نظر تیاریاں شروع ہو چکی ہیں۔ جلوس محمدی ﷺ کا اہتمام تمام اصول و ضوابط کو ملحوظ خاطر رکھتے ہوئے کیا جائے گا۔

ریاست مغربی بنگال کے دارالحکومت کولکاتا میں عید میلادالنبیﷺ کے موقع پر گلیوں سڑکوں کی مرمت کی جا رہی ہے، ساتھ ہی لوگوں سے یہ اپیل بھی کی جا رہی ہے کہ وہ جلوس میں بچوں کو لانے سے گریز کریں اور سماجی دوری کا خیال رکھیں۔ عید میلادالنبیﷺ کو اب چند روز باقی رہ گئے ہیں جس کے تحت کولکاتا شہر و اطراف کے مسلم آبادی والے علاقوں میں جلوس محمدی ﷺکا اہتمام کیا جائے گا۔

اس موقع کی مناسبت سے بھی میونسپل کارپوریشن کی جانب سے راستوں کی مرمت کی جا رہی ہے۔عام طور پر جیسا درگا پوجا کے موقع پر دیکھا جاتاہے۔ لیکن پہلی بار ایسا ہو رہا ہے کہ عید میلادالنبیﷺ کے موقع پر جلوس محمدی کے مد نظر خراب راستوں کی مرمت کی جا رہی ہے۔

کولکاتا: عید میلادالنبیﷺ کی تیاریاں زوروں پر

ہوڑہ ضلع کے مسلم آبادی والے علاقوں میں جن راستوں سے جلوس محمدی کا گزر ہوگا ان راستوں کی مرمت کی جا رہی ہے۔ساتھ جلوس محمدی میں شامل ہونے والوں کے لیے خصوصی ہدایات بھی جاری کی گئی ہیں۔

اس تعلق سے مقامی علماء کرام اور پولیس انتظامیہ کے مابین ایک میٹنگ ہوئی جس میں جلوس محمدیﷺ کے راستے اور جلوس میں شامل ہونے والے افراد کے لئے اصول و ضوابط طے کئے گئے۔

مقامی کونسلر ریاض احمد نے بتایا کہ' برسوں سے گھسٹری کے بھوٹ بگان اور بیلور کے علاقوں میں جلوس محمدی کا اہتمام کیا جاتا رہا ہے۔رواں برس بھی جلوس محمدیﷺ کا اہتمام مقامی علماء کرام کی قیادت میں کیا جائے گا۔ اس سلسلے میں ہوڑہ پولیس پوری طرح تیار ہے۔لیکن اس بار جلوس محمدیﷺ مختصر اور قدرےمختلف ہوگا۔

جلوس محمدی میں سماجی دوری کا خاص خیال رکھنا ہوگا ساتھ ہی جلوس میں بچوں اور عمردراز افراد کو لانے سے منع کیا گیا ہے۔