ممتا کے سامنے بی جے پی کے حامیوں نے جے شری رام کے نعرے لگائے

دوسرے مرحلے کی ووٹنگ کے دوران اعلی ممتا بنرجی نے متعدد پولنگ مراکز کا دورہ کیا۔ اس دوران انہیں بی جے پی کے حامیوں کی جانب سے ناراضگی کا سامنا کرنا پڑا۔ بی جے پی حامیوں نے ممتا بنرجی کے سامنے جے شری رام کے نعرے بھی لگائے۔

مغربی بنگال اسمبلی انتخابات کے دوسرے مرحلے کی پولنگ کے دوران نندی گرام میں بھی تصادم کی اطلاع ہے۔ متعدد پولنگ بوتھ کے باہر بی جے پی اور ترنمول کانگریس کے کارکنان کے درمیان جھڑپ کی اطلاع پر وزیر اعلی ممتا بنرجی نے پولنگ مراکز کا دورہ کیا۔

اس دوران انہیں بی جے پی کے حامیوں کی جانب سے ناراضگی کا سامنا کرنا پڑا۔ بی جے پی حامیوں نے ممتابنرجی کے سامنے جے شری رام کے نعرے لگائے۔

ترنمول کانگریس کے لیڈروں نے شکایت کی ہے کہ بعض بوتھوں پر بی جے پی کے حامی ترنمول کانگریس کے بوتھ ایجنٹ کو پولنگ بوتھ میں داخل نہیں ہونے دے رہے ہیں۔

اس کے بعد ممتا بنرجی اپنی عارضی رہائش گاہ سے باہر نکلیں اور متعدد بوتھوں کا دورہ کیا۔ انہوں نے سوناچورا، ریپارہ، بلرام پور، بوئل، نندی گرام بلاک 1 اور 2 میں پولنگ مراکز کا دورہ کیا۔

ممتا بنرجی کے انتخابی ایجنٹ شیخ سفیان نے کہا کہ وہ مختلف دیہاتوں اور بوتھوں کا بھی دورہ کریں گی جہاں سے دھمکیوں کی خبر آرہی ہے۔

نندی گرام کے بوئل علاقے کے باشندوں نےالزام لگایا کہ بی جے پی کے حامیوں نے انہیں پولنگ بوتھ پر جانے سے روکا ہے۔ ممتا بنرجی جیسے بوئل کے پاس پہنچے، بی جے پی کے حامیوں نے'جے شری رام' کے نعرے لگائے۔ پولس کے مطابق ترنمو ل کانگریس کے رہنماؤں نے بوتھ نمبر 7 میں دوبارہ پولنگ کا مطالبہ کرنے پر دونوں جماعتوں کے حامیوں کے درمیان جھڑپ ہوئی ہیں۔ انہوں نے مزید بتایا کہ صورتحال پر قابو پانے کے لیے پولیس کی ایک بھاری نفری موقع پر پہنچ گئی ہے۔

بوتھ نمبر پر ممتا بنرجی دو گھنٹے سے زائد وقفے تک پھنسی رہیں۔ یہاں پر الزام عاید کیا جارہا تھا کہ ترنمول کانگریس کے بوتھ ایجنٹ کو اندر داخل ہونے نہیں دیا جارہا ہے۔

یہ خبر ملنے کے بعد ممتا بنرجی وہاں پہنچی تو بی جے پی حامیوں نے انہیں گھیر لیا اورجے شری رام کے نعرے لگانے لگے۔ اس کے بعد یہاں پر کشیدگی پیدا ہوگئی۔ مرکزی فورسیز اور مقامی پولیس کو سخت مشقت کے بعد بوتھ نمبر 7 سے نکالا گیا۔

دوسری جانب شوبھندو ادھیکاری کے قافلے پر اس وقت حملہ ہوا جب وہ مختلف بوتھوں کا دورہ کررہے تھے۔ ترنمول کانگریس کے حامیوں نے بی جے پی لیڈر کے خلاف نعرے بازی کرتے ہی ان کی گاڑی کو گھیر لیا۔ مرکزی فورسیز نے کارروائی کرتے ہوئے مجمع کو منتشر کردیا اور قافلے کو آگے بڑھا دیا۔

ادھیکاری نے نامہ نگاروں کو بتایا کہ میں ترنمول کانگریس کے غنڈوں کے اس طرح کے مظاہروں کا عادی ہوں۔ وہ سب ممتا بیگم (بنرجی) کے پیروکار ہیں۔ 2 مئی کو نتائج آنے تک انہیں جو چاہیں کرنے دیں۔

ممتا بنرجی آج شام نندی گرام سے شمالی بنگال کے لیے روانہ ہوجائیں گی۔ نندی گرام میں دفعہ 144نافذ ہے۔

یواین آئی