ممتا بنرجی سے جب یہ سوال کیا گیا کہ ’’کیا آپ اپوزیشن جماعت کا چہرہ ہوں گی؟‘‘ ممتا بنرجی نے لیڈر شپ کے سوال پر کہا کہ ’’میں بلی کی گھنٹی بجانے میں تمام اپوزیشن جماعتوں کی مدد کرنا چاہتی ہوں۔ میں لیڈر نہیں بننا چاہتی، بلکہ ایک عام لیڈر کی طرح اپوزیشن لیڈروں کو متحد کروں گی۔‘‘
انہوں نے کہا کہ ’’میں سیاسی نجومی نہیں ہوں، یہ مستقبل کی صورت حال پر منحصر ہے کہ اپوزیشن اتحاد کی قیادت کون کرے گا۔ مجھے کوئی مسئلہ نہیں ہے اگر کوئی اور لیڈر اس اتحاد کی قیادت کرتا ہے۔ جب اس معاملے پر بات کی جائے گی تو اسی وقت ہم اس کا فیصلہ کریں گے۔ میں کسی پر مسلط نہیں ہونا چاہتی ہوں اور نہ میں کسی کو مسلط کرنے کے حق میں ہوں۔‘‘
پیگاسس جاسوسی سے متعلق ممتا بنرجی نے کہا کہ ’’یہ صورت حال ایمرجنسی سے بھی زیادہ سنگین ہے۔‘‘ مغربی بنگال کی وزیر اعلیٰ نے مزید کہا کہ ’’مرکزی حکومت کا رویہ غیر ذمہ دارانہ ہے۔ سوالات کا جواب دینے کے بجائے ای ڈی اور انکم ٹیکس کے ذریعہ چھاپے مارکر خاموش کرایا جارہا ہے۔ یہاں کوئی جواب نہیں ملتا۔‘‘