کولکاتا میں 72 گھنٹوں کے دوران کورونا سے ایک بھی موت نہیں ہوئی

مغربی بنگال کی دارالحکومت کولکاتا میں گزشتہ 72 گھنٹوں کے دوران کورونا وائرس سے ایک بھی مریض کی موت کی تصدیق نہیں ہو سکی ہے۔ یومیہ کیسز اور شرح اموات دونوں میں ریکارڈ کمی درج کی گئی ہے۔

مغربی بنگال میں کورونا وائرس کی دوسری لہر کی رفتار قابو میں آنے کے بعد تیسری لہر سے نمٹنے کی تیاریوں پر کام جاری ہے۔ حالانکہ کورونا وائرس کی دوسری لہر کی رفتار مکمل طور پر سست پڑنے کے باوجود نئے کیسز کے آنے کا سلسلہ پوری طرح سے ختم نہیں ہوا ہے، لیکن ریاستی حکومت اور محکمہ صحت کے لئے اچھی بات یہ ہے کہ کورونا وائرس سے مرنے والوں کی تعداد دس سے بھی کم ہو چکی ہے۔

دارالحکومت کولکاتا میں گزشتہ 72 گھنٹوں کے دوران کورونا وائرس سے ایک بھی مریض کی موت کی تصدیق نہیں ہو سکی ہے۔ یومیہ کیسز اور شرح اموات دونوں میں ریکارڈ کمی درج کی گئی ہے۔

مغربی بنگال محکمہ صحت کے مطابق گزشتہ 24 گھنٹوں کے دوران ریاست میں 717 لوگوں میں کورونا وائرس کی تشخیص ہوئی ہے۔ یومیہ کیسز کے آنے کی رفتار بے حد سست پڑ چکی ہے۔

دوسری طرف مغربی بنگال میں گزشتہ 24 گھنٹوں کے دوران کورونا وائرس سے نو لوگوں کی کورونا سے موت ہوئی ہے۔ گزشتہ کل کے مقابلے اس میں غیر معمولی اضافہ ہوا ہے۔

ریاست میں کورونا وائرس کے مریضوں کی کل تعداد 15 لاکھ، 32 ہزار 377 تک پہنچ چکی ہے جبکہ اس وبا سے اب تک 18 ہزار 120 لوگوں کی موت ہوچکی ہے۔

ریاست میں ایک دن میں کورونا سے 761 لوگ صحتیاب ہو کر ہسپتالوں سے گھر واپس لوٹے ہیں۔ اس طرح کورونا وائرس سے نجات پانے والے مریضوں کی تعداد بڑھ کر 15 لاکھ، 83 ہزار 742 ہو چکی ہے۔ اس کے ساتھ ساتھ صحتیابی کی فیصد 98.12 ہوگئی ہے۔

مغربی بنگال کے محکمہ صحت نے کہا کہ گزشتہ 72 گھنٹوں کے دوران کولکاتا میں کورونا وائرس سے ایک بھی مریض کی موت کی تصدیق نہیں ہوئی ہے۔ حالات میں تیزی سے بہتری آئی ہے، لیکن کورونا وائرس کی تیسری لہر کے مدنظر ہمیں احتیاطی تدابیر پر سختی سے عمل کرنے کی ضرورت ہے۔