تباہ شدہ جنوبی 24 پرگنہ کا آج وزیر اعلی ممتا بنرجی کا دورہ

مغربی بنگال اور اڑیسہ میں آئے 'امفان' طوفان نے بڑے پیمانے پر تباہی مچائی ہے۔ بنگال کے کئی اضلاع پوری طرح سے تباہ ہو چکے ہیں۔ وزیر اعلی ممتا بنرجی آج بنگال کے سب سے زیادہ تباہی کے شکار جنوبی 24 پرگنہ ضلع کا دورہ کریں گی، اس کے علاوہ کاکدیپ میں انتظامیہ کے ساتھ میٹنگ بھی کریں گی۔

'امفان' طوفان نے بڑے پیمانے پر بنگال کے مختلف اضلاع کو تباہ و برباد کر دیا ہے۔ ہر طرف تباہی ہی تباہی نظر آ رہی ہے۔ لاکھوں افراد بے گھر ہو چکے ہیں۔ 50 ہزار گھر مکمل طور پر تباہ ہو چکے ہیں۔کئی اضلاع میں پوری کی پوری فصل برباد ہو چکی ہے۔

وزیر اعلی ممتا بنرجی کو یہ کہتے ہوئے سنا گیا کہ سب کچھ برباد ہو گیا۔ جمعہ کے روز وزیر اعظم نریندر مودی کے ساتھ وزیر اعلی ممتا بنرجی نے تباہ شدہ علاقوں کا ہیلی کاپٹر کے ذریعے جائزہ لیا۔ اس سے قبل وزیر اعلی ممتا بنرجی نے کہا تھا کہ شمالی و جنوبی 24 پرگنہ مکمل طور پر تباہ ہو چکا ہے۔ جمعہ کے روز وزیر اعلی ممتا بنرجی نے جنوبی 24 پرگنہ کا نقشہ دکھاتے ہو کولکاتا ہوائی اڈے پر اعلان کیا کہ وہ ہفتے کو جنوبی 24 پرگنہ کے پاتھرپراتیما،گوشابا، باسنتی،نام کھانہ،کاکدیپ کا دورہ کریں گی ۔اس کے بعد کاکدیپ میں انتظامیہ کے ساتھ اہم میٹنگ کریں گی۔عید کے بعد مزید کئی اضلاع کا دورہ کریں گی۔

'امفان' طوفان کی وجہ سے کئی اضلاع میں بڑے پیمانے پر تباہی مچائی ہے۔اس کے علاوہ ریاستی وزراء کی ایک ٹیم تشکیل دی گئی ہے، جو تباہ شدہ اضلاع کا دورہ کریں گے۔ باز آبادکاروں کے کام میں اہم راستوں سے رابطہ ٹوٹ جانے اور بجلی کی فراہمی نہ ہونے کی وجہ سے کافی پریشانی ہو رہی ہے۔

ہوائی جائزہ کے بعد پتہ چلا ہے کہ سب سے زیادہ تباہی سندیش کھالی میں ہوئی ہے۔ وزیر اعلی ممتا بنرجی نے مرکز سے تمام تر مدد کی اپیل کی ہے۔ موبائل فون خدمات بحال کرنے کی انہوں نے اپیل کی ہے۔ مرکزی محکمہ توانائی اور مواصلاتی محکمہ سے بھی مدد طلب کی گئی ہے۔کورونا وائرس اور اس پر 'امفان' کی وجہ سے ریاست کو سخت حالات کا سامنا ہے۔ انہوں نے کہا کہ اصل کام بازآبادکاری ہے اور متاثرین کو واپس معمول کی زندگی پر لانا ہے۔