مرکز کے پاس ویکسینیشن کے لیے کوئی پالیسی نہیں: سوگتا رائے

ترنمول کانگریس کے سنئیر رہنما اور رکن پارلیمان سوگتا رائے نے مرکزی حکومت کی ویکسینیشن مہم پالیسی کو شدید تنقید کا نشانہ بنایا۔

مغربی بنگال کے شمالی 24 پرگنہ کے دمدم سے ترنمول کانگریس کے رکن پارلیمان اور سنئیر رہنما سوگتا رائے نے کہا کہ ملک کی موجودہ صورتحال کے لیے مرکزی حکومت ہی ذمہ دار ہے. انہوں نے کہا کہ بی جے پی کی قیادت والی مرکزی حکومت کے پاس کورونا ویکسینیشن کو لے کر کوئی مہم نہیں ہے. اسی وجہ سے گروپ میں لوگوں کو ویکسین دیا جا رہا ہے.

ترنمول کانگریس کے سنئیر رہنما اور رکن پارلیمان کا کہنا ہے ‘اگر مرکزی حکومت کے پاس کوئی پالیسی ہوتی تو پہلے اپنے ملک کے لوگوں کو کورونا ویکسین دینے کے انتظام کرتی پھر اس کے بعد غیر ممالک میں بھیجنے کے بارے میں سوچتی. مرکزی حکومت نے کیا کیا. پہلے غیر ممالک میں کورونا ویکسین بھیجا اور جب ہمارے ملک میں حالات بگڑے تو بے غیر ممالک مدد کے لیے آگے آئے. یہ کیسی پالیسی ہے. اس سے تو اپنے لوگوں کو نقصان پہنچا’.

رکن پارلیمان کا کہنا ہے ‘وزیر اعلیٰ ممتا بنرجی نے سب سے پہلے یونیورسل کورونا ویکسینیشن مہم کا مطالبہ کیا. کیونکہ اس مہم کے تحت ہر عمر کے لوگوں کو ویکسین ملنے کا امکان زیادہ ہے. یہ سب سے اچھا طریقہ ہے’.

ترنمول یوتھ کانگریس کے صدر ابھیشک بنرجی کی بی جے پی کے قومی نائب صدر مکل رائے کی بیمار اہلیہ کی عیادت کے سوال پر سوگتا رائے نے کہا کہ سیاست ہی سب نہیں ہے. کوئی کسی کی بھی عیادت کر سکتا ہے. اس کو لے کر تنقید اور بیان بازی کرنا غیر ضروری ہے'.

انہوں نے کہا کہ ترنمول کانگریس کو چھوڑ کر جانے والوں میں سے سے کون پارٹی میں شامل ہوگا کون نہیں ہوگا اس کا فیصلہ ممتابنرجی کریں گی.