پارٹی کے جنرل سکریٹری سوراورم سدھاکر ریڈی نے حیدرآباد میں ایک پریس کانفرنس سے خطاب کرتے ہوئے کہا کہ 11 اپریل کو پہلے مرحلے کی پولنگ کے لیے الیکشن کمیشن کی جانب سے اٹھائے گئے اقدامات غیر اطمینان بخش تھے۔
انہوں نے کہا کہ الیکشن کمیشن اپنا اعتبار دن بہ دن کھو رہا ہے اور عوام کو ایسا محسوس ہو رہا ہے کہ الیکشن کمیشن غیر جانبدار نہیں ہے۔
الیکشن کمیشن کے اس بیان پر کہ وی وی پیٹ کی گنتی میں 6 روز لگ جائیں گے۔ سدھاکر ریڈی نے کہا کہ وی وی پیٹ سلپس کی گنتی کے لیے سپریم کورٹ میں نظر ثانی کی ایک عرضی دائر کی جائے گی ۔
ای وی ایم میں شفافیت نہیں۔ بیلٹ پیپر استعمال کیے جائیں: چندرابابو
آندھرا پردیش کے وزیراعلی چندرا بابو نائیڈو نے الزام لگایا ہے کہ الیکٹرانک ووٹنگ مشینوں میں شفافیت نہیں ہے اور مطالبہ کیا کہ ان کی جگہ بیلٹ پیپر استعمال کیے جائیں۔
انہوں نے چیف الیکشن کمشنر سنیل ارورہ سے آج دہلی میں ملاقات کی اور آندھرا پردیش میں رائے دہی کے لیے کیے گئے انتظامات پر عدم اطمینان کا اظہار کیا۔
نائیڈو نے چیف الیکشن کمشنر سے درخواست کی کہ وہ الیکٹرانک مشینوں کے بارے میں اندیشوں کو دور کریں۔ انہوں نے اس سلسلے میں ایک میمورنڈم بھی دیا۔
چندرا بابو نائیڈو نے الزام لگایا کہ الیکشن کمیشن خودمختار ادارہ ہونے کے باوجود مرکزی حکومت کے اشاروں پر کام کر رہا ہے اور الیکٹرانک ووٹنگ مشینوں کے بارے میں ان کی پارٹی کی جانب سے ظاہر کی گئی تشویش کو نظر انداز کر رہا ہے۔
انہوں نے کہا کہ ریاست میں جب پولنگ شروع ہوئی تو پہلے ایک گھنٹہ میں 30 فیصد الیکٹرانک ووٹنگ مشینیں کام نہیں کر رہی تھیں اور متعلقہ عہدیدار وقت پر ان مشینوں کی خرابی کو دور نہیں کرسکے جس کے نتیجے میں رائے دہی کا عمل دیر رات تک جاری رکھنا پڑا۔
انہوں نے کہا کہ 22 سیاسی جماعتوں نے عرضی پیش کی تھی کہ کم از کم پچاس فیصد وی وی پیٹ سلپس کی گنتی کی جائے لیکن سپریم کورٹ نے اس مطالبے سے اتفاق نہیں کیا اور یہ فیصلہ سنایا کہ پانچ فیصد وی وی پیٹ سلپس کی گنتی کی جائیں گی۔
چندرا بابونائیڈو نے کہا کہ پانچ فیصد وی وی پیٹ کی گنتی سے الیکٹرانک ووٹنگ مشینوں میں شفافیت پیدا نہیں ہوگی۔
انہوں نے کہا کہ ای وی ایم کی جگہ بیلٹ پیپر استعمال کیے جائیں گے۔
انہوں نے کہا کہ وہ جمہوریت بچاؤ احتجاج کے لیے تائید حاصل کرنے دیگر سیاسی جماعتوں کے رہنماوں سے ملاقات کریں گے۔
انہوں نے اعادہ کیا کہ ای وی ایم کے بارے میں ان کا احتجاج جاری رہے گا۔
