مکل رائے کا دعویٰ مضحکہ خیز: ابھیشیک بنرجی

ترنمول کانگریس، سی پی ایم اور کانگریس کے 107 اراکین اسمبلی کے جلد ہی بی جے پی میں شامل ہونے کے مکل رائے کے دعوے پر ترنمول کانگریس کے نوجوان رہنما ابھیشیک بنرجی نے کہا کہ 'بڑ بولے لوگوں کی کمی نہیں ہے'۔

ابھیشیک بنرجی نے مزید کہا کہ 'جو کونسلرز کو سنبھال نہیں پارہے ہیں وہ اراکین اسمبلی کو خریدنے کی بات کررہے ہیں'۔

خیال رہے کہ حالی شہر میونسپلٹی پر دوبارہ ترنمول کانگریس کا قبضہ ہونے کے بعد کنچرہ پاڑہ کے کونسلرز بی جے پی چھوڑ کر اپنی پرانی پارٹی ترنمول کانگریس میں لوٹ رہے ہیں۔ کنچڑہ پارہ میونسپلٹی کے چیرمین اور وائس چیئرمین اپنی پرانی پارٹی میں لوٹ گئے ہیں۔ان میں ایک آزاد کونسلر بھی شامل ہیں۔

پریس کانفرنس سے خطاب کرتے ہوئے ابھیشیک بنرجی نے کہا کہ ہم پارٹی میں لوٹ رہے کونسلروں کا پارٹی میں استقبال کرتے ہیں۔ جمعرات کو پانچ کونسلر دوبارہ ترنمول کانگریس میں لوٹ گئے تھے۔
آج بھی کئی کونسلروں نے دوبارہ ترنمول کانگریس میں شمولیت اختیار کرلی ہے۔ میونسپلٹی پر قبضہ کرنے کیلئے 13 جادوئی عدد درکار ہے۔

انتخابی نتائج کے بعد 28 مئی کو دہلی میں کنچڑہ پارہ کے کئی کونسلروں نے بی جے پی میں شمولیت اختیار کرلی تھی۔

مکل رائے کا نام لیے بغیر ابھیشیک بنرجی نے کہا کہ ایک جرنیل میک ان چائنا ہے۔ یہی وجہ ہے کہ ڈیڑھ مہینے کے بعد 14کونسلر واپس آچکے ہیں۔ انہوں نے کہاکہ 107 اراکین اسمبلی کو بی جے پی میں شامل کرنے والے پہلے کونسلروں کی گھر واپسی کو رو کیں۔ جو کونسلروں کو بچا نہیں پارہے ہیں انہیں ٹیم سے نکال دینا چاہیے۔

خیال رہے کہ مکل رائے نے آج دعویٰ کیا ہے کہ کانگریس، ترنمول کانگریس اور سی پی ایم کے 107 ممبران اسمبلی جلد ہی بی جے پی میں شامل ہونے والے ہیں۔