بہار: اساتذہ کا احتجاج ہنوز جاری

ریاست بہار کے ضلع ارریہ میں یکساں ملازمت یکساں اجرت (مساوی کام کے بدلے مساوی تنخواہ) کے مطالبے پر پرائمری و مڈل اسکولوں کے کانٹرکٹ اساتذہ غیرمعنیہ مدت کے لیے ہڑتال پر ہیں۔

ارریہ میں گذشتہ 20 دنوں سے بہار کانٹرکٹ اساتذہ یکساں ملازمت یکساں تنخواہ کے مطالبے پر ہڑتال پر ہیں۔ حالانکہ ریاستی حکومت بہار اسمبلی میں بحث کے دوران کہہ چکی ہے کہ کانٹرکٹ اساتذہ کےاس مسئلے پر بات چیت کے لیے تنظیم کے ذمہ داران کو بلایا گیا ہے۔

دوسری جانب ارریہ پہنچے بہار ٹی ای ٹی اساتذہ یونین کے کنوینر راجو سنگھ نے صحافیوں سے گفتگو کرتے ہوئے ریاستی حکومت پر الزام عائد کرتے ہوئے کہا کہ وزیر تعلیم جھوٹ بول رہے ہیں انہوں نے کسی بھی تنظیم کے سربراہ کو بات کرنے کے لیے مدعو نہیں کیا ہے، اس طرح کی بات کرکے وہ اساتذہ کی تحریک کو کمزور کرنے کی کوشش کر رہے، جسے کامیاب نہیں ہونے دیا جائے گا'۔

راجو سنگھ نے کہا کہ وزیراعلیٰ نتیش کمار کہتے ہیں جو دیا ہے، ہم نے دیا ہے اور جو دیں گے وہ بھی ہم ہی دیں گے۔ اس پر انہوں نے کہا کہ 'نتیش کمار اپنا ذہن صاف کر لیں۔

راجو سنگھ نے مزید کہا کہ 'یہ حکومت تانا شاہ ہو گئی ہے، اب ہم خاموش نہیں بیٹھیں گے، ایک عرصے سے ہم اپنی لڑائی لڑ رہے ہیں لیکن حکومت ہمیشہ ہم لوگوں کو ٹھگنے کا کام کر رہی ہے جبکہ اس بار لڑائی آر پار کی ہے، ہمارے اساتذہ پر فرضی مقدمہ درج کرکے انہیں پریشان کرنے کی کوشش کی جا رہی۔ تنظیم ایسے اساتذہ کے ساتھ پوری مضبوطی کے ساتھ کھڑی ہے اور قانونی لڑائی لڑے گی '۔