ارریہ میں نہرو یوا کیندر کی جانب سے ایک ہفتے سے چل رہے وویکا نند جینتی پروگرام کے اختتام کے موقع پر پیٹنگ مقابلہ کا انعقاد کیا گیا۔ پروگرام کا آغاز آشرم کے مہراج سوامی وجے نند اور سوامی اکھلانند مہراج نے شمع روشن کر کے کیا جبکہ مہمان اعزازی کے طور پر ڈی ڈی سی منوج کمار شامل ہوئے۔
ڈی ڈی سی نے اس موقع پر طلباء سے خطاب کرتے ہوئے کہا کہ' نوجوان اور طلباء کے اندر پوشیدہ صلاحیتوں کو نکھارنے کا کام 'نہرو یوا کیندر' شروع سے کرتی آرہی ہے جو قابل ستائش ہے۔ میرا ماننا ہے ہر نوجوان میں کچھ نہ کچھ صلاحیتیں موجود ہیں مگر انہیں ایک پلیٹ فارم کی ضرورت ہے، اگر ایسے نوجوانوں کی صحیح نشوونما کی گئی تو یہ مستقبل میں ملک کی ترقی میں اہم کردار ادا کریں گے۔ ڈی ڈی سی نے کہا کہ سوامی وویکا نند نوجوانوں کے لیے ایک بہترین رول ماڈل ہیں، ان کی زندگی سے بہت کچھ سیکھا جا سکتا ہے'۔پینٹنگ مقابلہ میں شہر کے پانچ اسکول کے تیس بچے شامل ہوئے، پینٹنگ کے لیے صفائی، کورونا اور ماحولیات کے موضوع کا انتخاب کیا گیا۔ مقابلے میں موہنی دیوی میموریل اسکول، ارریہ پبلک اسکول ،گرلس آئیڈیل اکیڈمی ،کیریئر گائیڈ اکیڈمی کے بچے شامل ہوئے۔ اول، دوئم اور سوم آنے والے بچوں کو سرٹیفکیٹ اور میمنٹو دے کر حوصلہ بڑھایا گیا۔ اس موقع پر 'نہرو یوا کیندر' کے سکریٹری کرم ویر کمار نے کہا کہ یہ پروگرام ایک ہفتہ سے چل رہا تھا جو آج اختتام ہوا۔ ہم لوگوں کی کوشش ہوتی ہے اختتامی پروگرام کے موقع پر طلباء کے درمیان مقابلہ جاتی پروگرام منعقد ہو اور ان کا حوصلہ بڑھایا جائے۔ اس موقع پر نہرو یوا کیندر کے دیگر کارکنان بھی موجود رہے۔
