اتراکھنڈ کے کاشی پور میں گستاخ رسول یتی نرسنگھانند سرسوتی کے خلاف مسلم کمیونٹی کے لوگوں نے سخت ناراضگی کا اظہار کرتے ہوئے سڑکوں پر نرسنگھانند کے بائیکاٹ کا پوسٹر چسپاں کیا۔
مقامی لوگوں نے حکومت ہند سے نبی کریمﷺ کی شان میں گستاخی کرنے کے جرم میں نرسنگھانند کو فوراً گرفتار کرکے سخت سے سخت قانونی سزا دینے کا مطالبہ بھی کیا۔
شہر کے مفتی ذوالفقار خان نعیمی نے کہا کہ نرسنگھانند سرسوتی جیسے لوگ سستی شہرت حاصل کرنے کے لیے ملک کے امن وچین کو ختم کرنا چاہتے ہیں اور ملک میں فتنہ وفساد پھیلانے کی دہشت گردانہ کوشش کر رہے ہیں۔
انھوں نے مزید کہا کہ ایسے افراد کا صرف مسلمانوں کو ہی نہیں بلکہ ملک کے ہر امن پسند آدمی کو بائیکاٹ کرنا چاہیے اور ملک کو ایسے شرپسند لوگوں کی دہشت گردانہ فکر سے بچانے کی ہر ممکن کوشش کرنا چاہیے، تاکہ ملک میں امن و امان اور بھائی چارہ باقی رہے اس لیے حکومت وقت کو ایسے شخص کے خلاف جلد از جلد کاروائی کرکے اس کو سخت سے سخت سزا دینا چاہیے۔
