اس کے علاوہ دیگر نشستوں کے لئے دونوں جماعتوں نے ’دوستانہ‘ انداز میں انتخابات میں حصہ لینے کا اعلان کیا تھا۔
تاہم لداخ پارلیمانی نشست کے لئے نیشنل کانفرنس نے کانگریس کے بر عکس ایک آزاد امیدوار کو حمایت دینے کا اعلان کیا ہے۔
کیا لداخ پارلیمانی نشست پر این سی اور کانگریس میں ٹھن گئی؟ اس بارے میں کانگریس کے چیف سپوکس پرسن رویندر شرما نے ای ٹی وی بھارت کے ساتھ بات کرتے ہوئے کہا کہ ’’لداخ پارلیمانی نشست پر بی جے کے امیدوار کو چھوڑ کر جو بھی کامیاب ہوگا وہ کانگریس کا حامی اور یوپی اے سرکار کا ہی حصہ بنے گا۔‘‘
انکا کہنا تھا کہ ہر پارٹی اپنے امیدوار کو کامیاب بنانے کی بھرپور کوشش کرے گی، ’’گر چہ نیشنل کانفرنس نے ایک آزاد امیدوار کی حمایت کا فیصلہ کیا ہے تاہم کسی بھی غیر بی جے پی امیدوار کی کامیابی کو یو پی اے کی کامیابی ہی تصور کیا جائے گا۔‘‘
لداخ پارلیمانی نشست کے لئے کانگریس کے بجائے ایک آزاد امیدوار سجاد حسین کی حمایت کرنے کے بارے میں نیشنل کانفرنس کے صوبائی سیکریٹری شیخ بشیر احمد نے ای ٹی وی بھارت کو بتایا کہ ’’کرگل اور لداخ کے لوگوں نے ایک مقامی صحافی سجاد حسین کو اپنا نمائندہ چُنا ہے اس لئے ہم نے اُسی کی حمایت کا فیصلہ کیا ہے۔‘‘
واضح رہے کہ لداخ پارلیمانی نشست کے لئے 6مئی کو ہونے والے انتخابات کے لئے چار امیدوار میدان میں ہیں جن میں بی جے پی اور کانگریس کے علاوہ دو آزاد امیدوار شامل ہیں۔
آزاد امیدواروں میں کانگریس کے سابق رہنما اصغر علی کربلائی اور صحافی سجاد حسین شامل ہیں۔
